Қазақстан Республикасының Ұлттық академиялық кітапханасында         тарихшы-ғалым, академик Кеңес Нұрпейістің 90 жылдығына орай «Дарабоз тарихшы» атты Халықаралық дөңгелек үстел өтті.

Дөңгелек үстелдің мақсаты – академик Кеңес Нұрпейістің Отандық тарих ғылымының дамуына, Алаш қозғалысы тарихын зерттеуге қосқан үлесін және оның өмірі мен қызмет жолын тереңірек таныстырып, насихаттау.

         Шара аясында кітапханада «Кеңес Нұрпейіс - 90 жыл» атты кітап көрме ұйымдастырылды.  Модератор –Мемлекет тарихы институты директорының орынбасары, тарих ғылымдарының докторы, профессор Аяған Бүркітбай Кеңес Нұрпейістің ХХ ғасырдағы қазақ тарихын жасауға қосқан үлесіне жан-жақты тоқталды.

ҚР Ұлттық академиялық кітапханасының басшысы Күміс Сейітова

2017 жылы кітапхана қорына профессор Кеңес Нұрпейісұлының туыстары жеке кітапханасынан 3193 дана кітаптар жинағын сыйға тартқанын, барлық кітаптары Ұлттық академиялық кітапхананың электрондық катологына енгізілгенін айтып, дөңгелек үстел жұмысына сәттілік тіледі.

Онлайн және офлайн  форматта өткен шараның серіктесі – Мемлекет тарихы институты.

Шара барысында Алашорда үкіметінің қалыптасуы, тарихи жад және Кеңес Нұрпейістің ғылыми мұрасы, ХХ ғ. Қазақстан тарихын зерттеудегі қазіргі ұстанымдар тақырыптары кеңінен талқыланды.

Шараға онлайн қатысқан Қырғыз Республикасы Дипломатиялық Академиясының Вице – Президенті, тарих ғылымдарының докторы, профессор, Курманов Зайнидин,  тарих ғылымдарының докторы, «Мирзо Улугбек» ат. Өзбекстан Ұлттық университетінің профессоры Ишанходжаева Замира, PhD докторы, АҚШ азаматы Абасов Рафис және отандық тарихшы ғалымдар саналы ғұмырын Қазақстанның тарих ғылымына,  Алаш қайраткерлерінің тұлғасын терең зерттеуге арнаған көрнекті ғалымның ғылыми және тұлғалық болмысына тоқталды.

         Дөңгелек үстелге Мемлекеттік тарих институтының ғылыми қызметкерлері,  жоғарғы оқу орындарының профессорлық оқытушылар құрамы, докторанттар, магистранттар, студенттер, кітапханашылар, оқырмандар мен БАҚ өкілдері қатысты.