Черногорияның Ұлттық кітапханасында (Подгорица қ.) қазақтың ұлы ақыны, философы, ағартушысы Абай Құнанбайұлының 180 жылдық мерейтойына орай Абай орталығының салтанатты ашылуы өтті.

Қазақстан Республикасының Сыртқы істер министрлігі мен Қазақстан Республикасының Мәдениет және ақпарат министрлігінің қолдауымен өткен шараның мақсаты – Абай Құнанбайұлының шығармашылығын, қазақ әдебиеті мен мәдениетінің көрнекті өкілі ретінде, 180 жылдық мерейтойына орай халықаралық деңгейде насихаттау.

Абай орталығының ашылу салтанатына Черногорияның Қазақстан, Австрия, Германия, Словакия, Испания, Италия, Венгрия, Болгария, Түркия және Греция  Елшіліктерінің дипломатиялық өкілдері, Подгорицаның зиялы қауым өкілдері, қоғам белсенділері қатысты.

Абай орталығына 100–ден аса құжат табыс етті. Олардың ішінде қазақ, орыс, ағылшын, қытай т.б көптеген тілдерге аударылған Абайдың шығармалары, қарасөздері, абайтану кітаптары, өмір жолы мен шығармашылығына қатысты құнды деректер, сонымен қатар қазақ жазушылары Әбіш Кекілбаев, Кемел Тоқаев, Таласбек Әсемқұлов сынды ұлт зиялыларының кітаптары бар. Бұл құжаттар ҚР Ұлттық академиялық кітапханасы мен Абайдың “Жидебай-Бөрілі” мемлекеттік тарихи-мәдени және әдеби-мемориалдық музей-қорығынан алынды.

Орталықтың ашылу салтанатында сөз алған Қазақстан Республикасының Ұлттық академиялық кітапханасы директоры Күміс Сейітова бірлескен гуманитарлық жобаның маңыздылығына тоқталды:

«Абай орталығының ашылуына орай арнайы электронды мәліметтер базасы әзірленді. Аталған базаға авторлық құқықпен қорғалмайтын, қоғамдық игілікке айналған Абай Құнанбайұлының шығармалары енгізілді. Бұл материалдар Қазақстандық Ұлттық электронды кітапхана (kazneb.kz) қорынан алынған» – деді ол. 

Бұл орталық — өзара құрмет пен достастықтың символы ғана емес, сонымен қатар зияткерлік диалогқа, білім мен мәдени бастамаларға арналған алаң болмақ.