Қазақстан Республикасының Ұлттық академиялық кітапханасында «Бразилия, Венесуэла және Куба туристік пейзаждары» атты фотокөрме және Латын Америкасы елдерінің қазіргі және классикалық кинематографиясына арналған латынамерикалық фильмдер көрсетілімінің ашылуы өтті.

Іс-шараның мақсаты – Латын Америкасы елдерінің табиғи және мәдени әралуандығымен оқырман қауымды таныстыру, Қазақстан мен Латын Америкасы мемлекеттері арасындағы мәдени диалогты дамыту, сондай-ақ өнер, мәдениет арқылы халықаралық байланыстарды нығайту.

Фотокөрме кітапхана оқырмандарын Латын Америкасының таңғажайып бейнелерімен, табиғи сұлулығымен, мәдени ерекшелігімен және қайталанбас көркем келбетімен таныстырады.

Шара барысында Латын Америкасы елдерінің қазіргі және классикалық кинематографиясына арналған латынамерикалық фильмдер көрсетілімі ұйымдастырылды. Көрермендерді аймақтың бай мәдени мұрасымен және шынайы әлеуметтік болмысымен кино арқылы таныстыруды көздеген шара Қазақстан Республикасындағы Бразилия, Венесуэла және Куба елшіліктерімен бірлесіп ұйымдастырылды.

Іс-шараға Венесуэланың Сыртқы істер вице-министрі ханым Татьяна Пуг, Бразилияның Төтенше және Өкілетті Елшісі мырза Марсель Фортуна Биато, Венесуэланың Елшісі ханым Росальба Ло Буэ Антико, Кубаның Елшісі мырза Оскар Сантана Леон, Қазақстандағы дипломатиялық корпус өкілдері, қазақстандық ғылыми және шығармашылық зиялы қауымы, Астана қаласындағы оқу орындарының студенттері мен оқушылары, сондай-ақ кітапхана оқырмандары қатысты.