ҚР Ұлттық академиялық кітапханасының ұйымдастыруымен қазақтың белгілі жазушысы, Халықаралық Алаш сыйлығының лауреаты, Франц Кафка атындағы алтын медальдің иегері Асқар Алтай өз оқырмандарымен жүздесті. 

Танымал ақын, Т.Айбергенов атындағы сыйлықтың иегері Танагөз Толқынқызының «Үнсіз отырмашы» атты кітабының тұсауы кесіліп, өлеңсүйер қауым ақынның лирикалық жырымен сусындады. Әдеби, әдемі шараны ақын, Қазақстан Жазушылар одағының Астана қаласы филиалының директоры Дәулеткерей Кәпұлы жүргізді.

Шара аясында мың жылдық қазына-«Құтадғу білік» кітабын қарасөз түрінде оқырманына ұсына келген аудармашы, әдебиеттанушы Бекарыс Нуриманов көне дәуір жазбасы жайлы құнды ақпарат беріп, жаңа кітаптың таныстырылымын жасады.

Кішкентай оқырмандар үшін де сүйікті жазушыларымен жүздесіп, тілдесудің сәті түсті. Белгілі балалар жазушысы, фентези жанрында жазылған «Шоко әлем» кітабының авторы Рүстем Сауытбайдың туындылары бүгінде оқушыларға жақсы таныс. «Қиял көкжиегі» атты бұл кездесуде жазушы мен балалар арасында шынайы шығармашалық байланыс орнады.

Ұлттық кітапхананың бұл күні ұйымдастырған әдеби шаралары танымал ақын, жазушы Ұларбек Дәлейұлының «Авторлық қолтаңба айшықтары» атты кездесу-сұхбатымен қорытындыланды. Әдебиет жанашыры қазақ прозасы мен поэзиясын әлем оқырмандарына ұсыну жолында жасалуы тиіс ауқымды жұмыстарға тоқталды.

Алдағы күндері де сүйікті ақын-жазушыларымен кездескісі келетіндерге әдеби, рухани шара жалғасатынын хабарлаймыз.