Халықаралық Балаларды қорғау күніне орай ҚР Ұлттық академиялық кітапханасында  мерекелік шаралар өтті.

Жас оқырмандар балалар  жазушыларымен  кездесті. Шара аясында “Жошы хан» комиксі және «Хиуаз Доспанова кім?» атты екі кітаптың таныстырылымы өтті.

 «Жошы хан» комиксі ұлы даланың көрнекті тұлғасы, Шыңғыс ханның тұңғыш перзенті Жошы туралы жазылған. Комикс 2024 жылы ҚР Мәдениет және ақпарат министрлігі ұйымдастыруымен«Айбоз» ұлттық әдеби сыйлығының «Үздік комикс» номинациясы бойынша жеңімпазы атанды. Кітаптың таныстырылымын Қазақстан Жазушылар одағы Астана қалалық филиалының төрағасы Бауыржан Бабажанұлы жүргізді. Комикстің авторлары – тарихшы Жақсылық Сабитов, жазушы Зәуре Төрехан және бас суретші Елнар Бейміш кітаптың жазылу барысы мен мақсаттары туралы ой бөлісті.

Кездесу барысында тарихи мұраны насихаттаудағы комикс жанрының рөлі, балалар мен жасөспірімдерге арналған визуалды әдебиеттің маңызы сөз болды.

“Хиуаз Доспанова кім?» атты жаңа кітаптың таныстырылымын журналист Мейрамхан Жәпек жүргізді. Кітап авторлары белгілі журналист Тұрсын Қалимова мен балалар ақыны, журналист Серікбол Хасан.  «Мазмұндама» баспасының «Ол кім?» танымдық сериясы аясында жарық көрген кітапта Халық Қаһарманы, Ұлы Отан соғысының аңызға айналған ұшқышы Хиуаз Доспанованың өмірі мен ерлігі туралы түсінікті әрі мазмұнды түрде баяндады. 

Іс-шара барысында авторлар кітаптың жазылу барысы мен мақсаттары туралы ой бөлісіп, қатысушылармен сұхбаттасты. Іс-шараға журналист, қоғам қайраткері, ҚР Сенат депутаты - Нұртөре Жүсіп, Мемлекет және қоғам қайраткері, Қазақстанның еңбек сіңірген заңгері Ирак Елекеев, алаштанушы - ғалым, филология ғылымдарының докторы, профессор Айгүл Ісмақова, ақын, жазушы, манасшы, Қазақстанның еңбек сіңірген қайраткері Баянғали Әлімжанов, ақын, журналист, ақын,  журналист Нұрлан Қалқа, сондай-ақ мектеп оқушылары, кітапхана оқырмандары, зиялы қауым өкілдері мен қаламгерлер қатысты.

Мерекелік шара  жас өнерпаздардың әуезді әндері мен күмбүрлеген әсем күйлерімен жалғасты. Мерекелік шараға “Өнер» мектебінің оқушылары, астаналық «Балдәурен» вокалды тобы, №52 мектептің оқушылары және кітапхана оқырмандары белсене атсалысты.