2025 жылғы 22 мамырда Қазақстан Республикасының Ұлттық академиялық кітапханасында Халықаралық балаларды қорғау күніне орай «Балдәуренді бала шақ» атты балаларға арналған кітап көрмесінің ашылу салтанаты өтті. Іс-шараның басты мақсаты — балалар әдебиетін кеңінен насихаттау, жас ұрпақтың кітап оқуға деген ынтасын ояту, оқу мәдениетін қалыптастыру және баланың тұлғалық, рухани дамуына ықпал ету.

         Көрмеде қазақ және әлем әдебиетінің балаларға арналған үздік шығармалары, ертегілер, поэзиялық жинақтар, танымдық кітаптар мен суретті басылымдар ұсынылды. Көрме бірнеше бөлімнен тұрды:

         - «Ертегілер елі» — халық және авторлық ертегілер;

- «Қиял әлемінде» — фантастика және шытырман оқиғалы шығармалар;

- «Туған жер – тұнған шежіре» — отаншылдық пен туған елді сүюге баулитын әдебиеттер;

- «Әлем балалар көзімен» — шет ел авторларының балаларға арналған еңбектері;

- «Таным мен тәрбие» — энциклопедиялар, танымдық кітаптар, табиғат пен ғылым туралы басылымдар;

- «2024 жылы мемлекеттік тапсырыспен жарық көрген кітаптар» — мемлекеттік тапсырыс аясында жарық көрген жаңа басылымдар.

Көрмеге барлығы 182 дана кітап қойылды.

         Кітап көрмесінің ашылу салтанатын ҚР Ұлттық академиялық кітапханасының директордың орынбасары Нұржан Жолдыбалинов ашты. Іс-шараға ақын, филология ғылымдарының кандидаты Маржан Ершу, балалар ақыны, журналист, «Мұнара» газетінің бас редакторы Серікбол Хасан, «Өнер» мектебінің директордың орынбасары Гауһар Максутхановна, Д. Қонаев атындағы №66 мектеп-лицейінің оқушылары, ата-аналары мен ұстаздары және кітапхана оқырмандары қатысты.

         Бұл көрме балалардың әдебиетке деген қызығушылығын арттырып, олардың рухани дамуына серпін берді.