ҚР Ұлттық академиялық кітапханасында жазушы Ақан Нұрмановтың туғанына 90 жылдығына арналған «Алыс та жақын Ақан Нұрманов» ғылыми-практикалық конференция өтті.

Конференцияға Халық жазушысы, ҚР Мемлекеттік сыйлықтың иегері Төлен Әбдік, ақын, Халықаралық «Алаш» әдеби сыйлығының лауреаты Серік Тұрғынбекұлы, ҚР Мемлекеттік сыйлықтың иегері Сауытбек Абдрахманов, сыншы, халықаралық «Алаш» сыйлығының лауреаты Амангелді Кеңшілік, филология ғылымдарының докторы, профессор Рахымжан Тұрысбек, Мақпал Оразбек, Қостанай облысындағы Ақан Нұрманов атындағы мектептің директоры Қуандық Шоңғалов және жазушысы, драматург, Роза Мұқанова, Қойшығара Салғараұлы, Әлібек Асқар сынды зиялы қауым өкілдері мен ақын-жазушылар, қоғам қайраткерлері қатысты.

 Жиынды ақын, Қазақстан Жазушылар одағының хатшысы, Астана қаласы филиалының директоры Дәулеткерей Кәпұлы жүргізді.

Конференция барысында жазушы Ақан Нұрманов жайлы арнайы видеоролик көрсетіліп, оның өмір жолы мен шығармашылығы жайлы тың деректер, толғанысқа толы әңгімелер айтылды.

 Ақан Нұрманов (1933-1969) Алматы облысында туған. Қазақ мемлекеттік университетін бітірген. Қостанай облысының Амангелді аудандық «Социалистік шаруа», Қостанай облыстық «Коммунизм таңы», республикалық «Жас алаш» газеттерінде істеген. 1964 жылдан өмірінің соңына дейін «Жұлдыз» журналының бөлім меңгерушісі болған. Жазушының қысқа ғұмырында   «Құланның ажалы» романын, «Солай болған екен», «Ор», «Аққу шоғыры» повестерін, «Күн ертеңге ауып барады», «Ымырт» – әңгімелері жинақтары жарық көрген.