ҚР Ұлттық академиялық кітапханасында ұлы ақынның 180 жылдық мерейтойына орай  Абай Құнанбайұлының "Аттың сыны" өлеңін талдауға арналған дөңгелек үстел өтті. 

Шараның мақсаты – Абайдың ақындығынан бөлек,  атбегілік пен сыншылық өнердегі терең танымын ұрпаққа насихаттау.

Кездесу барысында ҚР Еңбек сіңірген қайраткері, жазушы,  Ұлттық ат спорты федерациясының құрметті президенті Сәдібек Түгел  Абай тойымен құттықтап, кітапханаға «Түркі халықтарының жылқы мәдениеті» кітабын сыйға тартты.

«Абай академиясының» президенті, ф.ғ.к. Жандос Әубәкір өлеңге терең талдау жасап:  «Абай бұл туындыда аттың болмысын суреткерлікпен сипаттап,  нағыз тұлпардың қасиеттерін шебер бейнелейді» – деп баға берді.

Профессор Қайрат Ихсан, «Арғымақ.Kz» сайтының бас редакторы Ержан Жаубай, журналист, ақын, "Әдебиет" порталының бас редакторы Ықылас Ожайұлы сынды қонақтар шығарманың тарихи-мәдени маңызын атап өтсе,  аудармашы Мекеш Тәліпұлы "Аттың сыны" өлеңін моңғол тілінде оқып берді.

Шараға ақын-жазушылар, ғалымдар, атбегілер мен жылқы мәдениетін зерттеушілер қатысты.