1 тамыз күні сағат Қазақстан Республикасы Мәдениет және ақпарат министрлігінің қолдауымен Қазақстан Республикасы Ұлттық академиялық кітапханасында қазақ халқының ұлы ақыны Абай Құнанбайұлының 180 жылдық мерейтойына арналған «Абай - тұтас бір әлем» атты кітап көрмесінің таныстырылымы өтті.

Көрменің мақсаты – Абай Құнанбаевтың шығармашылық мұрасын – өлеңдері мен қара сөздерін, аудармалары мен философиялық ой-толғауларын кеңінен насихаттау арқылы оның қазіргі қоғам дамуындағы маңызы мен рухани құндылығын тереңінен ашу. Көрмеге 184 кітап, 4 дәйекті сөз (цитата) және 8 сурет қойылды. Экспозиция бірнеше тақырыптық бөлімдерге бөлінген:

• Қалың елім, қазағым – Абайдың әр жылдары жарық көрген өлеңдер жинақтары мен поэмалары ұсынылған. 1909 жылы Санкт-Петербургте шыққан алғашқы басылымнан бастап, кейінгі толық жинақтар қамтылған.
• Абай және музыка – Абайдың ән мұрасы, музыкалық ықпалы, сондай-ақ оның әндерінің кейінгі опералық, симфониялық шығармаларға арқау болғаны баяндалған. «Абай әуендері», «Песенное творчество Абая», «Көңілімнің санасы» еңбектері қойылған.
• Абай – әлем тілдерінде – Абай шығармаларының ағылшын, араб, француз, қытай, жапон, орыс және тағы басқа тілдерге аударылған нұсқалары көрмеге қойылып, Абайдың әлемдік деңгейдегі ақын екендігін айғақтайды.
• Абайдың дүниетанымы – Ақынның рухани және философиялық көзқарасын, гуманистік идеяларын, адам болу іліміне негізделген еңбектер ұсынылған.
• Абай мұрагерлерінің еңбектері – Абай шығармашылығын алғаш зерттеген және насихаттаған Алаш арыстары мен кейінгі буын абайтанушылардың еңбектері топтастырылған.

Кітап көрмесінде елордалық зиялы қауым өкілдері, ақын-жазушылар, абайтанушы ғалымдар қатысты.