ҚР Ұлттық академиялық кітапханасында Наурыз мейрамына арналған «Ұлыстың Ұлы күні – Әз Наурыз»  атты мерекелік іс-шарасы өтті.

Жиналғандарды кітапхана директоры Күміс Сейітова Ұлыстың ұлы күнімен құттықтап, ел Президенті Қасым-Жомарт Тоқаевтың бастамасымен былтырдан бері ерекше тойланып жүрген  "Наурызнама" онкүндігінің маңыздылығына тоқталды.

Жазушы,  ҚР Мемлекеттік сыйлығының лауреаты Әлібек Асқар, белгілі ақын,  ҚР мәдениет қайраткері Бақытжан Тобаяқов, жазушы, Халықаралық «Алаш» сыйлығының лауреаты Толымбек Әбдірайым сонымен қатар Иран Ислам Республикасының Қазақстандағы Елшілік өкілі  Али Акбар Талеби Матин мырза, Татарстан Республикасы Өкілетті өкілінің орынбасары Ольга Ульдановалар мерекелік жылы лебіздерін білдірді.

Бұл күн Наурызнаманың онкүндігіне сәйкес ұлттық спорт түрлері насихатталатын күн болғандықтан, мерекелік шарада ұлттық ойындар ойнатылды.

Қазақтың ұлттық дәстүрлеріне мазмұн бере отырып, бағдарлама аясында ән шырқалып, би биленді. Ақсақалдар бата беріп, әжелер тойдың шашуын шашты. 

Шарада «Алтын домбыра» ұлттық тәрбие мектебі, «NOMAD» хореография академиясы, этно-мәдени бірлестік мүшелері т.с.с өнерпаздар өз өнерлерін ортаға салды. Сондай-ақ келген қонақтар дәстүрге сай мерекелік астан, Наурыз көжеден, бауырсақтан дәм татты.

Мерекелік шараға зиялы қауым өкілдері, танымал тұлғалар,  Қазақстандағы дипломатиялық елшілік өкілдері, ақын-жазушылар, БАҚ өкілдері, кітапханашылар мен оқырмандар қатысты.