2025 жылдың 14 ақпанында Қазақстан Республикасының Ұлттық академиялық кітапханасында Халықаралық кітап сыйлау күніне орай «Кітапханаға кітап сыйла» атты арнайы акция өтті. Бұл іс-шара кітап сыйлау мәдениетін насихаттау, оқырмандардың кітапханаға деген қызығушылығын арттыру және әдебиет пен білімнің дамуына үлес қосу мақсатында ұйымдастырылды. Акцияға әкімшілік мен шетел елшіліктерінің өкілдері, қаламгерлер, баспагерлер және кітап сүйер оқырмандар қатысты.

Іс-шараны Мәдениет және ақпарат министрлігі Архив, құжаттама және кітап бизнесі комитетінің Кітап ісі басқармасының басшысы Алмас Мырзахмет ашып, кітапхананың қоғамдағы рөлі мен кітаптың білім берудегі маңыздылығын атап өтті.

Салтанатты рәсімде Ұлттық академиялық кітапхананың «Құрметті оқырман» куәлігі кітапхана саласының дамуына ерекше үлес қосқан  Астана қаласы «Есіл» ауданының әкімі Қыдырбек-ұлы Дәрменияр Алғатбекұлына, ҚР Парламенті Мәжілісінің депутаты Баққожаев Анас Ахатұлына, ҚР Армения Республикасының Төтенше және Өкілетті Елшісі Гевондян Армен Вачиковичке, «Алтын Қыран» компаниялар тобының бас директоры Салжанов Исламбек Төлеубайұлына және «Эйр Астана» АҚ Борттық қызмет көрсету департаментінің вице-президенті Обухова Еленаға табысталды.

Шара барысында жазушы Баянғали Әлімжанов, ақын Нұрлан Қалқа, балалар жазушысы Зәуре  Төрехан сөз сөйлеп, кітаптың қоғамдағы орны мен оның болашақ ұрпақ үшін маңыздылығын, кітаптың тек білім беру ғана емес, сонымен қатар адамзаттың рухани байлығын сақтаудағы рөлін атап, кітапхананың мәдени мұраны сақтаудағы маңыздылығын айтты.

Шараға Сербия, Қырғызстан, Армения және КубаРесей, Беларусь, Индонезия, Әзірбайжан, Индия елшіліктерінің өкілдері қатысып, кітапханаға кітап сыйға тартты.

Кітап баспаларының өкілдері де құттықтау сөздерінде кітап өндірісін дамыту және оқырмандардың қажеттіліктерін қанағаттандыру бойынша жұмыстарын жалғастыратындықтарын мәлімдеді.

«Балалардан тарту» ашық микрофонында мектеп оқушылары өздерінің сүйікті кітаптарымен бөлісіп, оқуға деген ынталарын көрсетті.

Бұл акция Қазақстанда кітап сыйлау дәстүрін насихаттау, ұлттық әдебиет пен мәдениетті дамыту жолындағы маңызды қадам. Айтулы күнде өткен акция алдағы уақытта да жалғасын таба бермек.