10 желтоқсан күні Әзербайжан Ұлттық кітапханасында Түркітілдес елдердің ұлттық кітапханалары директорларының құрылтай отырысы өтті.

Басқосуға ТҮРКСОЙ ұйымы, Қазақстан, Қырғызстан, Өзбекстан, Венгрия, Солтүстік Кипр Түрік Республикасы Ұлттық кітапханаларының басшылары қатысты.

Іс-шараны Әзербайжан Ұлттық кітапханасының директоры, профессор Керім Тахиров ашып, құттықтау сөз сөйледі. Ол 1993 жылы құрылған түркітілдес елдердің Ұлттық кітапханалары директорларының ұйымы Түркия, Әзірбайжан, Қазақстан, Қырғызстанда көптеген кездесулер өткізгенін атап өтті. Алайда, бұл ұйымның ресми мәртебесі жоқ екенін алға тартып, осы отырыстың негізгі мақсаты – ұйымның одан әрі бағытын айқындау мен мәртебесін нақтылау екенін жеткізді.

Ұлттық кітапхана директоры: «Түркі әлемі мен түркітілдес халықтардың ұлттық-рухани құндылықтарын сақтау мен болашақ ұрпаққа беруде ерекше маңызды рөл атқаратын Ұлттық кітапханалардың қызметін үйлестіру, әлемдік деңгейде түркі мәдениеті мұрасын насихаттау – ұйымның негізгі міндеттері» - деп атап өтті.

Әзербайжан Республикасының Мәдениет министрі Әділ Керімли түркітілдес елдердің ұлттық кітапханалар ұйымы әлемнің барлық елдері үшін үлгі болатынын атап өтіп, ұйымды Түркі әлемінің ұлттық кітапханаларының бірлестігі деп атауды ұсынды. 

ТҮРКСОЙ халықаралық мәдени ұйымының Бас хатшысы, профессор Сұлтан Раев ұйымның құрылуын түрік мәдениетінің бай аспектілерін ашудағы үлкен қадам деп бағалады.

Профессор Сұлтан Раев пен профессор Керім Тахиров ұйымның "Түркі әлемінің ұлттық кітапханаларының бірлестігі" деп  аталуы болашақта оған Венгрия мен Моңғолияның, сондай-ақ Ресей Федерациясындағы түркітілдес  республикаларының кіруіне мүмкіндіктер ашатынын және тұтастай алғанда ұйымның ауқымын кеңейтуге мүмкіндік беретінін атап өтті. 

 Қазақстан Республикасы Ұлттық кітапханасының директоры Бақытжамал Оспанова өз сөзінде "Біз құзыретті ұйым құрып, келешекте міндеттер мен жұмыстарды бөлісуіміз керек, кәсіби мәселелерді шешу үшін жыл сайын жиналыстар ұйымдастырып, басқа шет елдермен мәдени дипломатиялық қатынастар орнатуымыз қажет"- деді.

ҚР Ұлттық академиялық  кітапханасының директоры Ғазиза Нұрғалиева құрылғалы отырған ұйымның аясында кітапханашылардың тәжірибе алмасуына жағдай жасау жайын және түркі әлемі елдерінің ұлттық кітапханалары өз серверлерінде тек интеграция арқылы Түркі әлемінің электронды кітапханасын, виртуалды оқырман залдарын құру туралы ұсынысын жеткізді.

Отырыс соңында Түркі әлемі ұлттық кітапханалары бірлестігінің төрағасы лауазымына профессор Керім Тахировтың кандидатурасы ұсынылып, мақұлданды.

Профессор Керім Тахиров отырысқа қатысушыларға алғысын білдіріп, жақын арада ұйымның жарғысы жасалатынын атап өтті, келесі кездесу Анкарада өтетінін еске салып, баршаға табыс тіледі.