ҚР Ұлттық академиялық кітапханасында жазушы Қанат Тілеуханның «Шатырдағы әйел» кітабының тұсаукесері өтті.
14 декабря 2023
ҚР Ұлттық академиялық кітапханасында жазушы Қанат Тілеуханның «Шатырдағы әйел» кітабының тұсаукесері өтті. Әдеби ортада оқырман тарапынан жақсы баға алып үлгерген кітаптың таныстырылымына адам көп жиналды.
Қанат Тілеуханның прозасына тән сипат – шынайылық. Біреулер мұны «қатал реализм» деп те бағалайды. Қалай болғанда да бүгінгі тұрмыс тауқіметі, адамдар арасындағы күрделі қарым-қатынас, өмір соқпағында түрлі жолға түсіп, тіршіліктің ауыр жүгін көтере алмай қиналған инсандардың көңіл-күйі қаламгердің туындысында айқын көрініс табады.
Кейіпкердің психологиялық күйінің әр алуандығы оқырманын бірден баурап алады. Жазушының айтқандарына илана отырып, сіз де өмір шындығымен бетпе-бет келесіз. Күрсінесіз, мұңаясыз, күлесіз. Кітап жалпы әдебиетсүйер қауымға арналған.
Қанат Тілеухан 1982 жылы Алматы облысы Ақсу ауданында дүниеге келген. Әл-Фараби атындағы Қазақ Ұлттық университетінде филология факультетін тәмамдаған. «Қараштың әңгімелері» атты прозалық кітаптың авторы. «Алтын тобылғы» әдеби байқауының проза номинациясы бойынша арнайы жүлдеге ие болған.
Әдеби кеште сөз алған ҚР Парламенті Сенатының депутаты Дархан Қыдырәлі қаламгердің жазу стиліндегі артықшылықтарға тоқталып, жылы лебізін білдірді.
Шараға зиялы қауым өкілдері, әдебиет жанашырлары, ақын-жазушылар, оқырмандар, қаламгердің жақындары қатысты.
