ҚР Ұлттық академиялық кітапханасында Қазақстан мен Испания арасындағы дипломатиялық қатынасқа 30 жыл толуына орай, танымал испан жазушысының қатысуымен әдеби кеш өтті.

Хавьер Моро – бестселлерге айналған «Pasión India» кітабының авторы. Бұл туынды 22 тілге аударылып, әлем оқырмандары арасында үлкен сұранысқа ие болған. Қаламгер отыздан аса еңбек жазып, әдебиет саласындағы «Premio Planeta», «Christopher Award» сияқты жүлделерге ие болған.

Осы іс-шара аясында ақын, Қазақстанның еңбек сіңірген қайраткері, Халықаралық «Алаш» әдеби сыйлығының иегері, Қазақстан Жазушылар одағы, Астана қалалық филиалының директоры Дәулеткерей Кәпұлының «Балбал зары» (ис. «El llanto delbalbal») атты испан тіліне аударылған кітабының таныстырылымы өтті.

Аталмыш шараға Испания Корольдігінің Қазақстандағы Төтенше және Өкілетті елшісі Хорхе Урбиола Лопес де Монтенегро және Дәулеткерей Кәпұлы, Танакөз Толқынқызы, Орынбай Жанайдаров, Олжас Қасым, Ербол Бейілхан сынды қаламгерлер қатысты.

Ұйымдастырушылар: Испания мемлекетінің Қазақстандағы елшілігі, Қазақстан Жазушылар одағы Астана қалалық филиалы «Фолиант» баспасы, Ұлттық академиялық кітапханасы.