Alqa ädebi-mädeni kluby kıtap taldau, pıkır almasu formatymen  qatar «TŪLĞATANU» leksialaryn  jūmys barysyna  qosty. Klub müşelerıne qazaq qoğamynyñ  damu jolynda baryn salğan, küresker, qairatker tūlğalar jaily leksia oqudy qolğa almaq.

Negızgı maqsat -  tarih qoinauynda «eñbegı elenbei» qalyp qoiğan, qapy da halqy ūmyta jazğan maitalmandarymyzdy qaita tarih sahnasyna qaita  şyğaru. Ūltym degen ūly tūlğalardyñ atyn jaña zaman tarihyna altyn ärıptermen qaşap jazu. Ärı öz tūlğamyzdy özımızben qaita qauyştyru. Köbıne tarihtağy tūlğalar jaily leksia iaki ğylymi konferensia bolsyn belgılı bır elita nemese sala mamandarynyñ arasynda ğana jüredı. Köpşılık halyqqa asa qatty nasihattala bermeidı. Osyndai qatelıkterdıñ ornyn «ALQA» ädebi-mädeni kluby öz şama şarqynşa toltyrsaq degen nietı bar.

Jauapty mındetterdı öz jauapkerşılıgıne ala kele Alqalyqtar «TŪLĞATANU» bağyty boiynşa alğaşqy leksiasyn öttı. Tūlğatanu şymyldyğy Beisembai Kenjebaevtyñ tūlğasymen aşyldy. Leksiany qazaq tılı men ädebietı pänınıñ mūğalımı, kıtap nasihattauşy bloger Ainūr Būlaqbai jürgızdı. Jalpy Beisembaidyñ bolmysy qalai qalyptasty? Qalai qaitpas qairatker tūlğağa ainaldy? – degen sūraq Alqalyq ärbır oqyrman oiyna jebedei qadaldy.

Beisenbai Kenjebaiūly 1904 jyly Türkıstan oblysy, Bögen auylynda düniege keledı. Kädımgı eşkımnen eş aiyrmasy joq bala. 4 jasqa kelgende, anasy qaitys bolady. Ögei şeşenıñ qolynda 7 jasqa deiın tūrady. Qyspaqqa şydamai, üiınen qaşyp Täşkenge keledı. Arba aidaidy, jaldanyp jūmys ısteidı, köşenıñ būzyq balalaryna eredı. Söitıp jürgende, Ğani Mūratbaev körıp, jetımder üiıne äkeledı.  Sonda Näzır Töreqūl kelıp, balalarğa sabaq bergen eken. Sabağynda aitatyny - Abai men onyñ öleñderı. Näzırdıñ özı elşılıkte ısteidı. Oğan jetımder üiıne sabaq beruge eşkım aqşa tölep jatqan joq. Qazaqtyñ balasy bılsın degen janaşyrlyq. Söitıp, Beisembai Abaidyñ şyğarmaşylyğyna qatty ğaşyq bolady. Keiın Mäskeu qalasyna oquğa tüsedı. Universitette qazaq tılı men ädebietten Mağjan Jūmabai sabaq beredı. Ony özıne ūstaz tūtady.

Bır künı ağaiy ertegı jazyñdar degen tapsyrma beredı.  Beisembai “Qyz ben taz” atty ertegını jazyp aparady. Şyğarmasyn ūnatyp, gazetke bastyrady. Sodan bastap maqala jazuğa qyzyğuşylyğy artady. Bız “Tazşa balany” halyq auyz ädebietı dep jürmız ğoi. Sony jazğan - Beisembai Kenjebaiūly. Bırde Mağjandy ūltşyl dep ūstaidy. Sonda bükıl şäkırtı Mağjanğa qarsy tūrady. Tek Beisembai ğana ūstazyn jaqtaidy. Ğylym sahnasyna Beisembai şyqqanda bızdıñ keibır kökelerımız qazaq ädebietı 18 ğasyr, Būqar jyraudan bastalady,-deidı. Qisynğa kelmeitın osy tūjyrymğa jalğyz Beisembai Kenjebaev qana qarsy bolady. Tek qarsy bolyp qana qoimai ğylymi, akademialyq formatta öz sözın rastap, dälel keltıredı. Qazaq ädebietın Orhon-Enisei, Kültegın jazbalarynan bastalatynyn ıs jüzınde däleldegen osy Beisekeñ. Onymen qoimai qazaq ädebietı men mädenietıne Mūhtar Mağauin, Qūlbek Ergöbek, Alma Qyraubaeva, Myrzatai Jodasbekov, Nemat Kelımbetov sekıldı tūlğalardy tärbielep, öz mektebınen ötkızıp daiyndap kettı.

«Mağjannyñ şäkırtı» dep atalğan Beisembai Kenjebaevtyñ leksiasyna tuğan nemeresı Janbolat Kenjebaevta qatysty. Atasy turaly memuar-estelıkterdı aityp, «ALQA» klubyna ystyq yqylasyn bıldırdı.