«ЖАС КІТАПХАНАШЫ 2023: ЖАҢА МҮМКІНДІКТЕР УАҚЫТЫ»

жастар лабораториясы басталды

Қазақстан Республикасы Мәдениет және ақпарат министрлігінің қолдауымен, Қазақстан Республикасының Ұлттық академиялық кітапханасының  ұйымдастыруымен 24 қазан – Кітапханашылар күні  мерекесіне орай  республикалық «ЖАС КІТАПХАНАШЫ 2023: ЖАҢА МҮМКІНДІКТЕР УАҚЫТЫ» атты жастар лабораториясы басталды.

Екі күнге созылатын форумға  «Altyn Qyran Foundation» қоғамдық қоры демеушілік көрсетіп отыр.  Сондай-ақ, шараға  Назарбаев Университеті, Л.Гумилев атындағы Еуразия ұлттық университеті, М.Нәрікбаев атындағы ҚазГЮУ университетінің Ғылыми кітапханалары қолдау көрсетуде.  

Қазақстандағы мемлекеттік кітапханалардың жас кітапханашылары қатысатын іскерлік кездесудің мақсаты – салаға келген жастардың мамандыққа деген сүйіспеншілігі мен кәсіби біліктілігін шыңдау, өзара тәжі­ри­бе алмасуына ықпал ету, іскер­лік қабілеттерін дамыту.

18 қазан күні таңертеңнен ҚР Ұлттық академиялық кітапханасына еліміздің түкпір-түкпірінен 50-ге жуық жас кітапханашылар жиналып, мерекелік шараның салтанатты ашылуына қатысты.  Форумның ашылуында сөз алған  ҚР Мәдениет және ақпарат министрлігі, архив, құжаттама және баспа ісі комитеті, кітапханалар басқармасының эксперті – Дина Аманжолова, "Алтын қыран" қоғамдық қоры "Маркетинг және жобалар" департаментінің директоры – Саят Жөкенұлы, «Дәулеттен» қайырымдылық қоры директорының орынбасары – Бекзат Қайрат форумның маңыздылығына тоқталып, жас кітапханашыларға сәттілік тіледі.

Алдын- ала әлеуметтік желіде ұйымдастырылған «Жас кітапханашы – 2023: жыл таңдауы» байқауына қатысқан 40 шақты үміткерден үздік деп танылған 10 маман кітапхана сахнасында өз жобаларын қорғап, бақ сынасты. Бар өнерлерін, іскерлік қабілеттерін  ортаға салды.

Осыдан соң кітапханашылар Назарбаев Университеті, М. Нәрікбаев атындағы ҚазЗУ, Л. Н. Гумилев атындағы ЕҰУ Ғылыми кітапханаларына, ҚР Ұлттық академиялық кітапханасына арнайы экскурция жасап, сала бойынша мәдени, білім ошақтарында ұйымдастырылған панельдік, форсайт сессияларға, практикалық семинарларға, тәжірибелі мамандардың шеберлік, іскерлік сағаттарына қатысады.

Биыл екінші рет ұйымдастырылып отырған жастар лабораториясына қатысушыларды ертең де рухани, мәдени, іскерлік түрлі шаралар күтуде.