«Өлеңмен өрілген өмір» Балалар жазушысы Ө. Тұрманжановтың туғанына 120 жыл толуына орай әдеби-поэзиялық кеш
10 декабря 2025
Қазақстан Республикасының Ұлттық академиялық кітапханасында «Отбасымен оқимыз» клубының аясында қазақ әдебиетінің көрнекті өкілі – ақын, прозашы, аудармашы, әдебиеттанушы, фольклортанушы, балалар жазушысы Өтебай Тұрманжановтың туғанына 120 жыл толуына арналған «Өлеңмен өрілген өмір» атты әдеби-поэзиялық кеш өтті.
Әдеби кеш барысында қаламгердің бай мұрасы, бала тәрбиесіне қосқан үлесі кеңінен насихатталып, қатысушылар поэзия мен парасат әлеміне саяхат жасады. Кеш аясында ақынның шығармашылығына арналған «Жыр жолымен өткен ғұмыр» атты көрме ұйымдастырылды.
Кеш қонағы, ақын, жазушы Баянғали Әлімжанов Өтебай Тұрманжановтың шығармалары бүгінгі жас буын үшін де тәрбиелік мәні зор, құндылығы жоғары екенін атап өтті.
Іс-шараға зиялы қауым өкілдері, әдебиет майталмандары, балалар жазушылары, журналистер, мектеп оқушылары мен ұстаздар, кітапхананың тұрақты оқырмандары және әдебиет сүйер қауым қатысты.
