ҚР Ұлттық академиялық кітапханасына жетісулық 150 қаламгердің 500-ге тарта кітабы сыйға берілді
09 февраля 2024
ҚР Ұлттық академиялық кітапханасына жетісулық 150 қаламгердің 500-ге тарта кітабы сыйға берілді. Жетісу облыстық мәдениет, архивтер және құжаттама басқармасының қолдауымен С.Сейфуллин атындағы Жетісу облысы орталық кітапханасының ұйытқы болуымен «Жетісу – кітап керуені» жобасы аясында іске асырылған шараның мақсаты – Елорда мен өңірлердің рухани байланысын нығайту, жергілікті ақын-жазушылардың шығармашылықтарын насихаттау.
Енді оқырман 2006 жылдан бері Жетісу облысы әкімінің қолдауымен шыққан жергілікті ақын-жазушылардың кітаптарын ҚР Ұлттық академиялық кітапханасының сөрелерінен таба алады.
«Бұл шара қаңтардың аяғында Талдықорған қаласында өткен кітап жәрмеңкесінің қорытындысы іспетті. Руханиятқа бай өңір тек өз оқырмандарына кітап ұсынумен шектелмей, сол қазыналарды ел астанасына жеткізуде бірегей жобаны іске асыруда. Жобаның ұлт құндылықтарын ұлықтаудағы, түгел ел болып кітапты насихаттаудағы үлесі орасан» – деді Жетісу облысының мәдениет, архивтер және құжаттама басқармасының басшысы Қуаныш Сүлейменов.
Шара барысында 2023 жылы Жетісу облысы әкімінің қолдауымен жарыққа шыққан жазушы, журналист, Қазақстан Жазушылар одағының мүшесі Жанат Елшібек пен журналист, жазушы, Қазақстанның еңбек сіңірген қайраткері Қадыр Әлімқұловтың кітаптарының тұсауы кесілді.
Мәдени шараға Астана қаласындағы Жетісу өлкесінен шыққан зиялы қауым өкілдері, ақын-жазушылар, оқырмандар қатысты.
