«Шынжырда өткен жолбарыс»
27 февраля 2023
«Шынжырда өткен жолбарыс»
Кітапханамыздың «Алқа» әдеби-мәдени клубы Жұмабек Тәшенге арналған «Шынжырда өткен жолбарыс» лекциясын өткізді. Лекцияның негізгі спикері Жұмабектану ісімен 21 жылдан бері айналысып келе жатқан Ерекболат Қабылда атты зерттеуші-ғалым.
Лекция барысы 3 бөлімнен тұрды. Кіріспе бөлімінде Жұмабек Тәшеннің балалық шағы, ауыл-аймағы туралы айтылса, негізгі бөлімде Жұмабектің билікке келіп, мемлекет ісіне араласқан тұсы баяндалды. Аса дарындылығы мен ұлтшылдығы арқасында Алматыдан қазақ ауылын құрғандығы, Республика сарайы алдындағы Абай ескерткішінің әлі күнге дейін сыр бермей, тас-түйін тұруы, Қазақстанның Мәскеуде өткен декадасында еліміздің 5 бірей жұлдызына СССР халық әртісі атағын алып беруі мәңгілік есте қалар оқиға. Жұмабектің «Қазақ әдебиеті» газетінің басына түскен қара бұлтты сейілткенін бірі білсе бірі білмейді. Қорытынды бөлімде маңдайға да билікке де сыймай кеткен Жұмабектің шынжырда өткен өмірі баяндалды. Алматыдағы биліктен аластатып Шымкентке қоныс аудартуы соның айқын дәлелі еді.
Жұмабек Тәшен феномені Кенесарының басы кесіліп, қазақ кісенделгеннен кейінгі дәуірдегі кең даламызды дүр сілкіндірген ғажайып жаңғырық іспетті. Себебі ой ұшқырлығының арқасында Хрущевпен арпалыста қазақ жерінің тұтастығын мүлт еткізбей, бір оқ атпастан аман сақтап қалған біртуар қаһарманымыз.
Бүгінгі ұрпақтың Жұмабек Тәшен алдында өтелмеген парызы, орындалуын күтіп тұрған борышы бар. Бұл баршамызға ортақ іс. Тарих тұлғаларын танытады.
