ҚР Ұлттық академиялық кітапханасында белгілі этнограф-жазушы, әдебиет зерттеушісі, ғалым, филология ғылымының докторы, профессор Ақселеу Сейдімбектің туғанына 80 жыл толуына орай «Алаштың Ақселеуі» тақырыбында дөңгелек үстел өтті. 

Модераторы: Мемлекет сыйлығының лауреаты, жазушы – Әлібек Асқар болды.

Дөңгелек үстелге белгілі жазушы, ғалымдар ­­– Мырзатай Жолдасбеков, Тұрсын Жұртбай, Қуаныш Сұлтанов және т.б. зиялы қауым өкілдері мен ЖОО-ның филолог магистранттары мен докторанттары қатысты.

Мақсаты – жазушының өмірі мен шығармашылығын жіті талдап, қатысушылар тарапынан көп туындайтын сауалдарға зиялы қауым өкілдерінен, көзі көрген жазушылар тарапынан жауаптар алу, этнограф болмысын ашу, еңбектерін талдау. 

Этнограф, жазушы Ақселеу Сейдімбек саналы ғұмырын қазақтың ауызекі тарихын, халқымыздың өнегелі салты мен шежіресін зерттеуге арнаған тұлға. Қажырлы еңбегі мен ғылымға деген құштарлығының арқасында абырой биігіне көтерілген өнегелі өмір жолы өскелең ұрпаққа қашанда үлгі.

Сондай-ақ, биыл жазушының «Ақиық» хикаятына 50 жыл толып отыр. Хикаятында қыран бүркітті ұстап, баптау жайын әңгімелейді. Адамдар арасында болатын мейірім мен жылылықтың табиғатқа жат еместігін айтады. Сол арқылы тіршілік ортасын аялауға шақырады. 

Шара аясында ғалым Ақселеу Сейдімбектің талай жылдық зерттеу еңбектері мен кітаптарынан көрме ұйымдастырылды.

Ақселеу Сейдімбек отызға тарта көркем, ғылыми-көпшілік және монографиялық кітаптардың авторы. Гомердің «Илиада», «Одиссея» дастандарын қара сөзбен аударған. И. Можейконың «7 және 37 керемет» кітабын тәржімалаған. Шығармалары оннан астам шетел тілдеріне аударылған.