"100 ең танымал кітап" жалпыұлттық сауалнама қорытындысы
12 Tamyz 2025
«KitapTime – 2025» ІҮ жалпы республикалық кітап фестивалі өз мәресіне жетті.
ҚР Мәдениет және ақпарат министрлігінің қолдауымен ҚР Ұлттық академиялық кітапханасының ұйымдастыруымен өткен кітап мерекесі биыл төртінші рет ұйымдастырылып отыр.
Фестиваль аясында еліміздегі және шетелдік баспалар мен кітап дүкендерінің қатысуымен ауқымды кітап және қолөнер жәрмеңкесі қойылды.
Фестивальдің ашылуына ҚР Мәдениет және ақпарат вице министрі Айбек Сыдықовтың құттықтау хаты оқылып, ҚР Ұлттық академиялық кітапханасының директоры Күміс Қарсақбайқызы жиналғандарды кітап мерекесімен құттықтады.
Еліміздің түкпір түкпірінде қатар тойланып жатқан кітап мерекесі биыл халқымыздың ұлы ақыны Абай Құнанбайұлының 180 жылдық мерейтойына орайластырылды.
Сондай-ақ, «Ауылға кітап» сыйлау акциясы, елшіліктердің «Ұлттық атрибуттар» кітап-иллюстрациялық көрмесі, шеберлік сағаттары, «BOOKCROSSING», «БИБЛИОРИНГ» әдеби ойыны, поэзиялық батл сынды түрлі рухани шаралар келушілерді қызықтыра түсті.
Саяси ғылымдарының докторы, профессор Әбдіжәлел Бәкір, Жүргеновтанушы Сәпен Әбдіқадырұлы, Қырғызстан және Венесуэла Боливария Республикаларының Төтенше және Өкілетті Елшілері сынды қонақтар құттықтау сөз сөйлеп, шараның маңыздылығына тоқталды.
Шара барысында қазақтың тұңғыш бард әншісі, ақын, сазгер Табылды Досымовқа арналған «Қазақтың Табылдысы» атты сырлы саз сағаты өтті.
Одан соң шара АҚШ-та 21 күн велосаяхат жасап, Абайдың рухани мұрасын халықаралық деңгейде дәріптеген журналист, велошабандоз Ернат Рахметолламен кездесу-сұхбатқа ұласты.
Астана қаласы әкімдігінің Музыкалық жас көрермен театры М.Әуезовтің «Абай-Тоғжан» музыкалық драмасынан үзінді қойды, астаналық танымал өнер иелері ән-күйден шашу шашты. Жас ақындар арасында «Күзгі жыр» атты поэзиялық батл өтті.
Сондай-ақ, оқырмандар арасында «Мамандық әлемі» атты танымдық куиз ұйымдастырылды.
Бұл күн республиканың барлық өңірлерінде кітапханалар бастамасымен кең көлемде аталып өтті.
Кітап оқуды кеңінен насихаттау мақсатында ұйымдастырылған шараға зиялы қауым өкілдері, шетел елшіліктерінің өкілдері, баспагерлер, суретшілер, қолөнер шеберлері, БАҚ өкілдері, кітапханашылар, оқырмандар, Астана тұрғындары, жалпы алғанда 4000-ға жуық оқырман қатысты.
