Түркі әдебиетінің классигіне арналған «Мұхаммед Физули – 530 өлең жолы» кітабының тұсауы кесілді
25 Qyrkúıek 2024
Кітапханада Әзербайжан Республикасының Қазақстандағы мәдени күндері аясында «Мұхаммед Физули - 530 өлең жолы» атты кітабының тұсауы кесілді.
Түркі мәдениеті мен мұрасы қоры жарыққа шығарған бұл кітап Әзербайжанның ұлы ақыны және түркі әдебиетінің классигі Мұхаммед Физулидің 530 жылдығына арналған. Кітап ақынның 22 ғазал мен 6 хасидадан – 530 өлең жолынан тұрады. Шараны жазушы, ақын, сценарист, Әзербайжан Жазушылар одағының мүшесі Илгар Фахми жүргізді.
Кітап тұсаукесерінде Халықаралық түркі мәдениеті мен мұрасы қорының президенті Ақтоты Райымқұлова Мұхаммед Физули шығармаларын қазақ тіліне аудару туралы баяндады. Сонымен қатар Әзербайжан Ұлттық Ғылым академиясының өкілі, филология ғылымдарының докторы, профессор Фирангиз Азизова түркі әлемі контекстіндегі Физули шығармашылығының маңызы туралы айтты.
«Біз «Қазақстан мен Әзербайжан бауырлас елдер» дейміз. Бұл - екі халықтың тамыры терең ғасырларға кететін туыстығын әйгілейтін дерек. Екі елді байланыстыратын әдеби, мәдени, рухани дүниелер екені сөзсіз. Солардың қатарында Қорқыт атаның «Китаби дедем Қорқыт», Махмұд Қашқаридың «Диуан Лұғат ат-Түрік», Жүсіп Баласұғын мен Низами Гәнжауидің үндескен трактаттарын, Насир әд-Дин әт-Туси мен Имамеддин Насимидің философиялық ойларын атауға болады. Бүгінгі Түркі мәдениеті және мұрасы қоры шығарып отырған жинақ «Мұхаммед Физулидің 530 жылдығына арналады. Ақын мұрасын насихаттауда бұл аударма еңбектің орны ерекше, оқырманға берер танымы терең»,-деді ҚР МАМ Архив, құжаттама және кітап ісі комитетінің төрағасы Рустам Али.
Халықаралық шараға Қазақстан мен Әзербайжанның ғылыми және шығармашылық зиялы қауым өкілдері, жазушылар, ақындар, аудармашылар, әдебиеттанушылар, кітапханашылар мен оқырмандар қатысты.
