«Оқуға құштар жас» республикалық кітап оқу байқауының қорытындысы
09 Qazan 2023
2023 жылдың 6 қазан күні, сағат 15.00-де «Dauletten» қайырымдылық қоры» жеке қорының бастамасымен және ҚР Ұлттық академиялық кітапханасы мен «Қазақстан студенттер Альянсының» бірлесе ұйымдастыруымен өтіп жатқан «Оқитын ұлт» жобасы аясындағы «Оқуға құштар жас» республикалық кітап байқауы қорытындыланды. Халық арасында кітап оқу мәдениетін насихаттау, жастардың кітап оқуға деген қызығушылығын арттыру, білімді, талантты жастарды анықтауды мақсат еткен кітап жарысының өту мерзімі 2023 жылдың 10 маусымы мен 10 қыркүйек аралығын қамтыды.
Байқауға қатысуға өтінімдер алдын ала www.dauletten.kz сайтына қабылданған. Кітап оқу байқауына 18-35 жас аралығындағы 2500-ден аса оқырман тіркелген. Оқуға міндеттелетін шығармалар тізімінде С. Торайғыровтың «Қамар сұлу» романы, Ә.Нұршайықовтың «Ақиқат пен аңызы», Р. Отарбаевтың «Біздің ауылдың амазонкалары», Д. Исабековтің «Қарғын», А.Мантайдың «Жүрекке оралу» атты туындылары бар.
Бекітілген 6 шығарманы оқуға 3 ай уақыт берілді және әр шығарма белгіленген мерзімде оқылуы тиіс болатын. Әр шығарманы оқу уақыты аяқталғаннан кейін ZOOM платформасы арқылы талқылау өтті. Әр шығарманы оқу барысында қатысушыға әлеуметтік желіде #daulettenqorykitap2023, #akademiyalikkitapkhana хэштегімен кемінде 1 пост жариялау міндеттелген.
Байқау қорытындысында оқылған шығармалар бойынша онлайн платформада тест тапсырылды. Тест нәтижесінде үздік деп танылған 20 қатысушы финалдық кезеңге жолдама алды.
Жолдама алған қатысушылар арасынан байқау жеңімпаздарын анықтау мақсатында ҚР Ұлттық академиялық кітапханасында түске дейін тест алынды, оқылған кітаптар бойынша талқылау өтті, кітапханаға экскурция ұйымдастырылды.
Шарада ҚР Мәжілісінің депутаты, «Dauletten қайырымдылық қоры» ЖҚ қамқоршылық кеңесінің төрағасы – Д.Мұқаев, ҚР Ұлттық академиялық кітапханасының директоры – Ғ.Нұрғалиева, ақын, жазушы – Ұ.Нұрғалым, «Қазақстан студенттер Альянсы мен ҚР Мәдениет және ақпарат министрлігінің өкілдері жобаның тиімділігіне тоқталып, үміткерлерге сәттілік тіледі.
Республикалық кітап оқу жарысын қорытындылай келе, үміткерлер арасынан үздік деп танылған Мадина Сахипова (БҚО) байқаудың бас жүлдесін және (Saparla Travel компаниясы ұсынған сыйлық) Дубайға жолдаманы ұтып алды. Жүлделі 1- орынды және 200 000 (екі жүз мың) теңге сыйлықты Зухра Кажимова (Жетісу облысы) иеленді. Сондай-ақ, 2- орын және 150 000 (жүз елу мың) теңге – Динара Есімбековаға (Түркістан қаласы), 3-орын және 100 000 (жүз мың) теңге – Ханша Анеловаға (Астана қаласы) бұйырды.
Тағы 10 қатысушыға ынталандыру сыйлығы және 50 000 (елу мың) теңге табысталды.
Байқау қатысушылары әлем әдебиеті және қазақ әдебиеті шығармаларын талдауға, жастардың жаңа орта табуына жағдай жасаған. оқырмандардың, студенттердің интеллектуалдық пайым - парасатын арттырып, кітап оқу мәдениетін қалыптастыруға ерекше ықпал еткен жоба алдағы уақытта да дәстүрлі түрде өтіп тұрса деген тілектерін жеткізді.
