Айгүл Сейілдің «Ой-керуен» атты кітабы оқырманға жол тартты
15 Jeltoqsan 2022
ҚР Ұлттық академиялық кітапханасында ақын, журналист Айгүл Сейілдің «Ой-керуен» атты кітабының таныстырылымы өтті.
Қаламгердің бұл кітабына әр жылдары жазып, «Егемен Қазақстан», «Қазақ әдебиеті», «Жас қазақ», «Жас алаш» сынды мерзімді басылым беттерінде жарияланған зерттеулер, сұхбаттар, танымдық мақалалар енген.
Аталмыш шараға Қазақстан Жазушылар одағының Астанадағы филиялының төрағасы, ақын Дәулеткерей Кәпұлы бастаған қаламгерлер мен журналистер және зиялы қауым өкілдері қатысып, Айгүл Сейілдің шығармалары туралы ой бөлісті. «Бұл кітапті уақыт тауып оқып шықтым. Өте салмақыт құнды дүниелер жарық көріпті. Мұндағы әдеби зерттеулер шұбалаң емес жинақы жазылған. Айгүл нағыз шығармашылықтың адамы екенін жақсы білесіздер. Күнделікті баспасөздің қажетін қанағаттандырып, жуналистиканың жүгін арқалай жүріп, өзінің осындай шығармашылық әлеуетін көрсете білу көп адамның қолынан келмейді. Айгүлге шығармашылық табыс тілеймін», - деді Дәулеткерей Кәпұлы.
Айта кетейік, Аталған еңбек, Қазақстан Республикасы Мәдениет және спорт министірлігі «Мәдениет және өнер саласындағы бәсекелестікті жоғарылату, қазақстындық мәдени мұраны сақтау, зерделеу мен насихаттау» бағдарламасы аясында жарық көрген.
«Ол — алғашқы жыр жинағын студент шағында шығарып үлгерген ақын. Оның аудармалары түпнұсқадан асып түспесе кем емес. Әдеби шығармаларға жасаған талдауыларының танымы терең. Себебі қай шығарманы талдаса да, оны болмысымен түсінгендей әсер қалдырады. Кез келген оқырман аңғармауы мүмкін тым нәзік тұстарын да өзінің қағылездігімен байқап, ерекше талдайды», - дейді журналист Клара Нақып.
