«Сұлтан Байбарыс», «Ер қаруы - бес қару» және «Юрта на вершине пирамиды» атты кітаптарының таныстырылымы

           17 қазан сағат 15.00-де ҚР Ұлттық академиялық кітапханасында Шығыстанушы, Мысырдағы мәмлүктер тарихын зерттеуші, арабтанушы ­­­­­­- Қайрат Сәкидың «Сұлтан Байбарыс», «Ер қаруы - бес қару» және «Юрта на вершине пирамиды» атты кітаптарының таныстырылымы өтеді.

           Таныстырылым модераторы - журналист  Мақат Садық, Қазақстан Республикасы Сыртқы істер министрінің орынбасары Әділ Қапанұлы Тұрсынов,  Қазақстан Республикасы Парламенті Мәжілісінің депутаттары Сауытбек Адрахманұлы Абдрахманов, Дархан Қамзабекұлы Мыңбай, Сәрсенбай Құрманұлы Еңсегенов, филология ғылымдарының докторы, профессоры Серік  Негимов, Рақымжан Сағымбекұлы Тұрысбек, Мейірбек Молдабекұлы Молдабеков, Қуатжан Серікқазыұлы Уәлиев, Дарико Мағауияқызы Мажиденова, «Дипломатия жаршысы» журналының бас редакторы Ілияс Темірланұлы Омаров, Абай қорық-музейінің директоры, «Абай қоры» президенті  Әубәкір Жандос Мағазбекұлы, «Қазақтану» зерттеу институтының директоры Жұмаділдин Бақтыбай, кәсіпкер, кітап демеушісі Нәсіпбай Ахметов,  жазушы Жүнісбаев Несіп, Дәулеткерей Кәпұлы, жас ақын Арман Шеризат және т.б. зиялы қауым өкілдері мен оқырмандар қатысады.

           Таныстырылымда Сұлтан Байбарыстың бүгінгі қоғамдағы адамзат үшін тұлғалық орын алатын бейнесін ашу және оқырманға мәмлүк-қыпшақ әлемін зерттеп, ұсынған автор еңбегін насихаттау. 

           Жинақта ізденіс пен зерттеу жұмыстары негізінде жазылған тарихи мәліметтерді түпнұсқа қайнаркөзден сүзіп алынып, араб жылнамашыларының шежірелік жазбалары мен батыс ориенталистерінің тұжырымдарынан мол деректер келтірілген.

Кітаптарда құлдықтан айбынды мемлекет сұлтандығына дейін көтерілсе де өнебойы жорықта жүрген баһадүрдің тағдыры сын сәттердегі батыл ержүректігі мен қайсар мінезі, тапқырлығы, ақылдылығы, мырзалығы бастан кешкен оқиғалармен қызықты өрбиді.

                   Сонымен қатар, әлемнің жеті кереметі қатарындағы пирамидалар үстінде мәмлүктердің киіз үй тіккендігі жөнінде мәліметтер бар. «Ер қаруы – бес қару» деген тіркестердің астында жеке қару түрлерін бабаларымыздың қалай қолданғаны мәмлүк әскери трактаттары мен қазақ ауыз әдебиеті үлгілерінде сақталған материалдары негізінде көрсетеді.