14 қазан күні сағ. 14.30-да  ҚР Ұлттық академиялық кітапханасында
Қожа Ахмет Ясауи атындағы Халықаралық қазақ-түрік университетінің Еуразия ғылыми-зерттеу институты және Л.Н. Гумилев атындағы Еуразия ұлттық университетінің «Абай академиясы» ғылыми-зерттеу институтының бірлесіп ұйымдастыруымен «The Wisdom of the Great Steppe – Abai Kunanbaiuly» және «Абай Құнанбайұлы: сипаттамалы библиографиялық көрсеткіш» атты қос бірдей ғылыми еңбектің таныстырылымы өтеді.

Іс-шараға белгілі әдебиеттанушылар мен ғалымдар, шетелдік дипломатия өкілдері, жоғары оқу орындары мен ғылыми мекемелердің басшылары, БАҚ өкілдері қатысады. 

«The Wisdom of the Great Steppe – Abai Kunanbaiuly» - ұжымдық монографиясы ағылшын тілінде Анкарада жарық көрді. Бұл монография  шетелдік қауымға  қазақтың бас ақыны Абай мен оның мұрасын жан-жақты танытуды мақсат еткен баламасыз ғылыми басылым. Кітапта отандық және шетелдік ғалымдардың ұлы ойшыл ақынның заманы, туып өскен ортасы мен өмірі, ұлт зиялыларына ықпалы, әдеби мұрасы мен мектебі, шығармаларының қолжазбасы мен тілдік ерекшеліктері, діни көзқарасы мен тарихи дүниетанымы, философиясы мен данышпандығы, абайтану саласындағы өзге де өзекті мәселелер жан-жақты қамтылды.

Екітомдық «Абай Құнанбайұлы: сипаттамалы библиографиялық көрсеткіші» – 1889 ж. бастап баспасөзде шыққан алғашқы мақаладан бастап  2020 ж. дейінгі барлық жарияланымдарды мүмкіндігінше толық қамтыған ғылыми басылым. Аталмыш библиографиялық көрсеткішке 12 мыңнан астам дерек қамтылған.

Бірінші томда қазақ және шет тілдеріндегі 1069 басылымға ғылыми сипаттама жазылған, 105 кандидаттық, докторлық және PhD диссертацияның сипаттамасы берілген. Екінші томға 10,5 мыңнан астам мақала мен жазушы М. Әуезовтің «Абай жолы» роман-эпопеясының барлық тілдегі басылымдарының толық тізімі енгізілген.