Қазақстан Республикасының Ұлттық академиялық кітапханасында 19 қараша күні көрнекті жазушы, ақын, тарихшы, этнограф, аудармашы Сапарғали Ысқақұлы Бегалиннің туғанына 130 жыл толуына арналған «Қазыналы қаламгер» атты әдеби кеш өтті.

Іс-шараның мақсаты – қазақ әдебиетінің аса көрнекті өкілі, көпқырлы қаламгер Сапарғали Бегалиннің бай шығармашылық мұрасын кеңінен насихаттау, оның балалар әдебиетіне қосқан елеулі үлесін көрсету, сондай-ақ жас ұрпақтың ұлттық әдебиетке, тарихи тұлғаларға деген қызығушылығын арттыру және әдеби танымын тереңдету.

Сапарғали Бегалин – қазақ балалар әдебиетінің негізін қалаушылардың бірі. Ол әдебиетке 1914 жылы «Айқап» журналында жарық көрген «Қазақ бозбалаларына» атты өлеңімен келді. Қаламгердің шығармалары терең мазмұнды, көркем тілімен ерекшеленіп, шынайы өмір көріністерін бейнелейді.

 Әдеби кеште кіріспе сөз сөйлеген Ұлттық академиялық кітапханасының ғылыми хатшысы Аслан Ғафуров шараның маңыздылығына тоқталды.

Кітапхананың сирек басылымдар қорында Сапарғали Бегалиннің шығармашылық мұрасын айғақтайтын құнды дүниелер сақталған. Олардың қатарында жазушының 1948 жылы жарық көрген «Төлбасылар» атты очерк пен әңгімелер жинағы және 1957 жылы орыс тілінде басылып шыққан «Рассказы» кітабы бар. Сонымен қатар қаламгердің әр жылдары жарық көрген кітаптары мен түрлі басылым беттерінде жарияланған шығармалары да кітапхана қорынан орын алған.

Әдеби кеш аясында жазушының өмірі мен шығармашылығына шолу жасалып, шығармаларынан үзінділер оқылды, бейнематериалдар көрсетіліп, кітап көрмесі ұйымдастырылды.

Әдеби кешті Қазақ радиосының жетекші редакторы, Ақпарат саласының үздігі Жанболат Шәкім жүргізеді.

Шараға зиялы қауым өкілдері – ақын, абайтанушы Алмахан Мұхаметқалиқызы,  педагогика ғылымының кандидаты, доцент Бижан Игенбаева, жазушы, әдебиеттанушы, кинодраматург Айгүл Кемелбаева, жазушы, әдебиеттанушы, кинодраматург, ақын, филология ғылымдарының кандидаты Маржан Ершу, журналист, «Хабар 24» телеарнасының тілшісі Ернат Рахметолла сынды құрметті қонақтар, сондай-ақ,  № 32  мектеп- гимназиясының оқушылары және № 57, №59 мектеп –лицейінің, 101 жәйлі мектеп, оқушылары, ұстаздар, ата-аналар, техникалық колледж студенттері, кітапхана оқырмандары қатысты.