ҚР Ұлттық академиялық кітапханасында Темірбек Жүргеновтің 125 жылдығына орай жарық көрген «KOMISER JÜRGENOV» және «ТЕМИРБЕК ЖУРГЕНОВ: ТРИУМФ И ТРАГЕДИЯ» кітаптарының тұсаукесері өтті.

  2023 жыл - ТҮРКСОЙ ұйымының шешімімен қазақтың мемлекет және қоғам қайраткері Темірбек Жүргенов жылы деп жарияланған болатын. Халықаралық ұйым даңқты тұлғаның құрметіне орай жыл бойы түрлі шаралар ұйымдастырды. Соның ішінде жоспарға сәйкес, жазушы Бейбіт Қойшыбаевтың “Комиссар Жүргенов” кітабы түрік тіліне аударылса, жазушы Алмажан Өтеғалиеваның “Темирбек Жургенов: Триумф и Трагедия” кітабы орыс тілінде жарық көрді.

 Жазушы Б. Қойшыбаевтың «Комиссар Жүргенов» романында аса көрнекті мемлекет, қоғам және мәдениет қайраткері, үлкен террор құрбаны Темірбек Қараұлының өмір жолы, өскен ортасы, ел игілігін көздеген жанқиярлық еңбегі, қуғын-сүргінге түскен отбасының ахуалы суреттеледі. Жары Дәмеш Әмірханқызының  жазықсыз жазаланған ерінің есімін қоғам өміріне қайтару жолында ұзақ жылдар тынымсыз тер төккені әңгімеленеді.

Ал жазушы Алмажан Өтеғалиеваның «Темирбек Жургенов: триумф и трагедия» атты кең көлемдегі мұрағат деректеріне сүйене отырып жазылған монографиялық еңбегінде  Қазақ АКСР-нің Халық ағарту комиссары Темірбек Жүргеновтің (1898-1938) мемлекеттік және қоғамдық-саяси қызметі жан-жақты ашылған.

«Қазақстан республикасы Мәдениет және ақпарат министрлігі Т.Жүргеновтің мұрасын насихаттауды әрдайым назарда ұстайды. Қазақ мәдениетінің темірқазығындай тұлғаның болмысы баршамызға үлгі» – деді шарада сөз алған вице-министр Арман  Жүдебаев.

Халықаралық  ТҮРКСОЙ ұйымының  бас хатшысы Сұлтан Раев шараның маңыздылығына тоқталды. «Былтыр 125 жылдығын күллі Түркі дүниесі бірігіп тойлаған асыл азаматтың әдеби-публисцистикалық мұрасын түбегейлі зерттеп, мәдениетіміз бен әдебиетіміздің тарихында алатын орынын нақты белгілеу – сіз бен біздің және келешек ұрпақтың мойнындағы парыз» – деді Сұлтан Әкімұлы.

Рухани шараға Мемлекет және қоғам қайраткелері, ҚР Парламент депутаттары, ҚР Президентінің жанындағы Ұлттық құрылтай мүшелері, ақын-жазушылар, зиялы қауым өкілдері, журналистер мен кітапхана оқырмандары қатысты.