Дүниежүзілік кітап және авторлық құқық күні мен Қазақстан Республикасы Ұлттық академиялық кітапханасының 20 жылдығына орай  кітап апталығының аясында Қазақстандық Ұлттық электронды кітапхананың қорын толықтыру мақсатында серіктес ұйымдармен ынтымақтастық келісім-шартқа, авторлармен авторлық келісім шартқа ресми отыру рәсімі өтті.

Жаңа серіктестерге Қазақстандық Ұлттық электронды кітапханасының таныстырылымы жасалды,оның ерекшеліктері мен мүмкіндіктері жайлы ақпарат берілді.  

Қазақстандық Ұлттық электронды кітапхана қорын толықтыруға қызығушылық танытып келгендер ғалымдар мен  журналистердің қатарында

аудармашы, филология ғылымдарының кандидаты, Қазақстан Жазушылар және Журналистер одағының мүшесі – Орынбек Жолдыбай, профессор, техника ғылымдарының докторы – Әуез Байдабеков, филология ғылымдарының докторы, профессор, әдебиет зерттеушісі – Сәуле Тапанова,  филология ғылымдарының кандидаты, доцент – Гүлжаухар Болатовалар болды. Ақын, «Төлеген Айбергенов» атындағы сыйлықтың иегері Ұларбек Дәлейұлы, ақын, Қазақстан  Жазушылар одағының мүшесі Толқын Қабылша, айтыскер ақын Әсем Ереже сынды қаламгерлер Қазақстандық Ұлттық электронды кітапханасының жаңа серіктестері атанды.

Авторлар еңбектерін ҚазҰЭК қорына жариялау үшін кейбір ерекше емес құқықтарын авторлық келісім-шартқа отыру арқылы кітапханаға берді. 

 «Шараның басты мақсаты – Қазақстандық Ұлттық электронды кітапхана қорын ғылыми еңбектермен байыту, жас қаламгерлердің жаңа туындыларын насихаттау. Қазақстандық ғалымдар мен қаламгерлердің туындыларын әлем пайдаланушыларына ұсыну мен депозитарлық қорда сақтау»- деді ҚР Ұлттық академиялық кітапханасының басшысы  Ғ.Нұрғалиева.