Баспасөз парағы

Биыл – көрнекті ақын, Қазақстанның еңбек сіңірген қайраткері, Халықаралық «Алаш» әдеби сыйлығының лауреаты, «Құрмет» орденінің иегері Қани Арман Бақтанұлының туғанына 70 жыл толды.

Аталған мерейтойға орай Павлодар облысының әкімдігінің қолдауымен, облыстық Мәдениет, архивтер және құжаттама басқармасының ұйымдастыруымен «Толқын-толқын жыр туар бізден кейін» атты  республикалық жыр мүшайрасы өтті. Мүшәйраға еліміздің әр өңірінен 40 жасқа дейінгі 30 ақын қатысты.

Бүгін Астана қаласындағы ҚР Ұлттық академиялық кітапханасында аталған мүшәйраның жеңімпаздары мен жүлдегерлерін марапаттау рәсімі және «Таңдамалы» шығармалар жинағының тұсаукесері өтті. Бұл кітаптарды «ҚР Ұлттық академиялық кітапхана»  қорына арнайы табыстады.

Жыр додасына ақын, Қазақстан Республикасының Еңбек сіңірген қайраткері, Абай атындағы Мемлекеттік сыйлықтың лауреаты, Баянауыл ауданының Құрметті азаматы Ғалым Жайлыбай, ақын, Абай атындағы Мемлекеттік сыйлықтың лауреаты Серік Ақсұңқарұлы, ақын, Қазақстан Жазушылар одағы Астана қалалық филиалының директоры Дәулеткерей Кәпұлы, ақын, Қазақстан Республикасы Парламенті Мәжілісінің депутаты Жарқынбек Амантай және ақын, жазушы, «Aiqara.kz» ақпараттық порталының бас редакторы Жұмабек Сманов қазылық етті.

Мүшәйра қорытындысында жүлде қоры 500 мың теңгені құраған Бас жүлдені Алпысбай Хонж жеңіп алды.

1-орын 400 мың теңгелік жүлде қорымен Жұлдызай Ысқақ, 2-орын 300 мың теңгелік жүлде қорымен Айбек Оралхан, 3-орын 200 мың теңгелік жүлде қорымен  Олжас Қасым еншіледі.  

Сонымен бірге, 100 мың теңгелік жүлде қорымен «Аманжол Шәмкенов атындағы» арнайы жүлдені Біржан Ахмер, «Мұзафар Әлімбаев атындағы» арнайы жүлдені Айдана Сегізбаева иеленді.  Жүлдегерлерге сертификаттар мен арнайы дипломдар табысталды.

Іс-шара барысында С.Торайғыров атындағы облыстық кітапхана мен Бұқар жырау атындағы әдебиет және өнер музейінің қорындағы ақын өмірі мен шығармашылығына қатысты кітаптар мен жәдігерлер қойылған көрме ұйымдастырылды.

Қазақстан Республикасының Ұлттық академиялық кітапханасы

                               Байланыс ақпараттары: Астана қаласы,  Достық көшесі, 11.

e-mail: uak_2022@mail.ru

Аккредитация үшін:  87027639151