Қазақстан Республикасы Мәдениет және ақпарат министрлігінің ұйымдастыруымен 20 қазан күні 24 қазан – Кітапханашылар күні мерекесіне орай Қазмедиа орталығында «Руханият шырақшысы» атты мерекелік шара өтті.
30 Qazan 2023
Қазақстан Республикасы Мәдениет және ақпарат министрлігінің ұйымдастыруымен 20 қазан күні 24 қазан – Кітапханашылар күні мерекесіне орай Қазмедиа орталығында «Руханият шырақшысы» атты мерекелік шара өтті.
Салтанатты іс-шараның мақсаты — қоғамдағы кітапханашы мамандығының беделін арттыру, имиджін қалыптастыру және еліміздің түкпір-түкпірінде руханият саласына еңбек сіңіріп жүрген кәсіби майталмандарды дәріптеу.
Мерекелік жиынға ҚР Мәдениет және ақпарат министрі Аида Балаева, Қазақстанның әр өңірінен келген кітапханашылар, Мемлекет және қоғам қайраткерлері, зиялы қауым өкілдері, ұлттық ЖОО, колледж және мектеп кітапханаларының мамандары, облыстық кітапханалар мен ардагер кітапханашылар қатысты.
Іс-шара аясында әр өңір кітапханаларының озық жобалары таныстырылып, кітапхана тарихына арналған көрме қойылды.
Сондай-ақ ұзақ жылдар еңбек етіп, кітапхана саласының дамуына айрықша үлес қосқан қызметкерлер ҚР Мәдениет және ақпарат министрлігінің «Мәдениет саласының үздігі» төсбелгісімен, «Құрмет грамотасы» және «Алғыс хатымен» марапатталды.
Қазақстан Республикасы Мәдениет және ақпарат министрі Аида Балаеваның қатысуымен Казмедианың Мәжіліс залында құрылтай мүшелері және кітапхана ісі саласының құрамымен дөңгелек үстел өтті. Онда кітапхана ісін жетілдірудің барлық бағыттары бойынша түрлі ұсыныстар мен пікірлер айтылды.
Кітапхана ісінің жағдайын зерделеп, сараптай отырып, сала мамандары өзекті мәселелерін ортаға салды. Сонымен қатар кітапхана қорын толықтыруда сұранысқа сай кітаптардың жарыққа шығуына мүмкіндік туғызу жайы қозғалды.
Қазақстан Республикасы Мәдениет және ақпарат министрі Аида Ғалымқызы сала бойынша қандай мәселенің де оңтайлы шешілуіне, кітапхана ісінің жандануына қолдау білдіретінін жеткізді.
Естеріңізге сала кетсек, елімізде 12 мыңға жуық кітапхана бар. Оның ішінде Мәдениет және ақпарат министрлігіне қарасты республикалық, облыстық, аудандық, ауылдық дәрежеде 4 мыңға жуық кітапхана жұмыс істейді. Сонымен қатар мектеп, колледж, жоғары оқу орындары мен ведомстволар және ғылыми зерттеу институттарында да кітапхана қызметі бар. Қазіргі таңда бұл салада республика бойынша 20 мыңдай кітапханашы еңбек етуде.
ҚР Ұлттық академиялық кітапханасының ұжымы «Руханият шырақшысы» атты мерекелік шарада марапатталған барша әріптестерді бүгінгі жетістіктерімен құттықтайды!
