ҚР Ұлттық академиялық кітапханасында ғалым, шығыстанушы, тарихшы, фольклоршы, этнограф, географ Шоқан Уәлихановтың туғанына 190 жыл толуына орай «Шоқан Уәлихановтың ғылыми мұрасы: тарих пен саясат сабақтастығы» атты халықаралық ғылыми-тәжірибелік конференция өтті.

Конференция аясында ғалымның өмір жолымен кеңірек таныстыру мақсатында «Шоқан Уәлихановтың ғылыми және әдеби мұрасы» атты көрме ұйымдастырылды. Көрмеге ҚР Ұлттық академиялық кітапхана қорында жинақталған Шоқан Уәлихановтың мұралары, еңбектері және ол туралы әдебиеттер қойылды.

Ғылыми конференцияны тарихшы, тарих ғылымдарының докторы, профессор Бүркіт Аяған жүргізді.

Шарада сөз алған кітапхана басшысы Күміс Сейітова: «Қазақтың ұлы ғалымы Ш. Уәлиханов отандық ғылым мен әдебиет тарихында үлкен орын алатыны бәрімізге аян. Оның қысқа да жарқын өмірі мен ғылыми қызметі, қазақ  халқының дамуына сіңірген еңбегі және рухани ізденістері туралы конференцияға қатысып отырған ғалымдар кеңінен талқылайтынына сенімдімін» – дей келіп, жиналғандарды кітапханадағы Ш. Уәлихановқа қатысты сирек құжаттармен таныстырды. Олардың ішінде 1904 жылы Ш. Уалихановтың досы болған орыс шығыстанушысы Николай Иванович Веселовский жазған «Шоқан Уәлиханов және оның еңбектері» атты кітап, сондай-ақ 1905 жылы Санкт-Петербургте П.М. Мелиоранский басып шығарған Ш. Уәлихановтың қолжазбаларынан алынған «Едіге мен Тоқтамыс жайлы аңыз» атты еңбектер бар.

Шара аясында тарих ғылымдарының докторы, Л.Н.Гумилев атындағы Еуразия ұлттық университетінің профессоры Махсат Алпысбесұлы, шоқантанушы, Әл-Фараби атындағы ҚазҰУ-нің тарихшы-ғалымы, профессор Самат Көшенұлы Өтениязов, жазушы, филология ғылымының кандидаты Жарылқап Бейсенбай сынды шоқантанушы ғалымдар, тарихшылар Ш. Уәлихановтың шығармашылығы мен өмір жолына қатысты баяндамалар оқып, ғылыми зерттеулерінің, еңбектерінің тарихи маңызын жан-жақты талқылады.

Конференцияға онлайн қосылған Ресей және Ұлыбритания елдерінің өкілдері Халықаралық ғылыми-тәжірибелік конференция сәттілік тіледі.

Шараға белгілі қоғам және мемлекет қайраткерлері, шоқантанушы және алаштанушы ғалымдар, БАҚ өкілдері, журналистер, ЖОО-ның магистранттары мен студенттері қатысты. Басқа қатысушылар online ZOOM платформасы арқылы атсалысты.