2025 жылдың 5 қараша күні Ш. Уәлиханов атындағы Жамбыл облыстық әмбебап ғылыми кітапханасында «Цифрлы қоғам және кітапхана» атты республикалық кітапханашылар конференциясы өтті.

Кітапхана саласындағы заманауи үрдістер мен цифрландыру дәуіріндегі жаңа мүмкіндіктер, инновациялық тәжірибелерді талқылауға арналған кәсіби алаңға еліміздің түкпір-түкпірінен 300-ден астам кітапханашы жиналды.

Конференцияға ҚР Ұлттық академиялық кітапханасының директоры Күміс Сейітова қатысып, «Заманауи кітапхана: дамудың перспективалы үлгілері» тақырыбында өткен пленарлық отырысқа жетекшілік етті.

Отырыста «Жаңа буын кітапханаларын жаңғырту ерекшеліктері», «Жаңа жағдайдағы жоғары білім: академиялық кітапханаларға қойылатын талаптар», «Кітапхана – зияткерлік элитаның көзі және адам капиталының дамуы», «Еңбек пен шығармашылықтың үйлесімі» сынды тақырыптар төңірегінде тәжірибелі кітапханашылар баяндамалар жасап, жаңа буын кітапханаларын жаңғырту бағыттары талқыланды.

Сондай-ақ, баяндамашылар кітапхана қызметіндегі жаңа технологиялар мен IT-шешімдерді қолдану жолдарын қарастыру мәселелерін қозғады.

Жамбыл облысы әкімдігінің қолдауымен өткен ауқымды шарада жиналғандарға А.Тоқпанов атындағы Жамбыл облыстық қазақ драма театры актерлерінің «Тараз шайырлары» атты театрландырылған прологы ұсынылды. Жамбыл облысы әкімінің орынбасары Серік Сәлемов құттықтау сөз сөйлеп, кітапхана ісінің дамуына үлес қосып жүрген үздіктерді марапаттады.

 Одан әрі кітапханашылар конференциясы Жамбыл ауданының орталық кітапханасында жалғасты.