Қазақстан Республикасының Ұлттық академиялық кітапханасында Кеңес Одағының Батыры, даңқты жауынгер, көрнекті жазушы Бауыржан Момышұлының туғанына 115 жыл толуына орай «Ұшқан ұя» кітабын талдау сағаты өтті.

Іс-шара аясында «Рухы биік, есімі мәңгі» атты кітап көрмесі ұйымдастырылды. Көрмеге батырдың өмірі мен шығармашылығын танытатын еңбектер, кітаптары, фотоматериалдар мен сирек басылымдар қойылды.

Шараға Астана қаласы әкімдігінің Бауыржан Момышұлы атындағы №53 мектеп-лицейінің оқушылары қатысты. Олар жазушының ұлттық тәрбиені насихаттайтын «Ұшқан ұя» шығармасын жан-жақты талдай отырып, өз ой-пікірлерін ортаға салды.

Шараның мақсаты – жас ұрпақтың бойына отансүйгіштік, адалдық, еңбекқорлық, үлкенді сыйлау мен кішіге қамқор болу сынды ізгі қасиеттерді сіңіру, ер балаларда дұрыс мінез қалыптастыру, Бауыржан Момышұлының өнегелі өмірін үлгі ету.

Іс-шараға мектеп ұжымы мен оқушылары, ата-аналар, оқырмандар, сондай-ақ ІІМ-ге қарасты департаменттердің өкілдері қатысты