Атырау қаласындағы Ғ. Сланов атындағы облыстық әмбебап-ғылыми кітапханада 30 тамыз – Конституция күніне орай «Келешегіміздің кепілі» атты кітап көрмесі ұйымдастырылып, «Жаңарған ата заң жарқын болашаққа қызмет етеді» деген тақырыпта библиографиялық шолу жасалды.
10 тамыз А. Құнанбаевтың туған күніне арнап ұйымдастырылған «Абай мұрасы – мәңгілік қазына» кітап көрмесінің ашық қарауы, «Ғұлама ғұмыр айнасы» (Ұлы жазушы, қоғам қайраткері М. Әуезовтің туғанына 110 жыл толуы қарсаңында), «Азамат ақын» (ақын, Қазақстан халық жазушысы М. Шахановтың 65 жылдығына), «Көрнекті қаламгер» (жазушы Д. Досжанов 65 жылдығына), «Сын саңлағы» (жазушы, ғалым, сыншы С. Қирабаевтің 80 жылдығына) атты кітап көрмесі құрылды. Оқырмандар көрме сөрелеріндегі жазба байлықтарымызмен жақынырақ танысуға мүмкіндік алды.
Кітапхананың оқу залында 16 қыркүйек - Қазақстан халықтарының тіл мерекесіне арналған өзге ұлт өкілдері арасында сайыс өтті. Сайыстың мақсаты - өзге ұлт өкілдеріне туған тіліміздің қадір-қасиетін, қазақ тілінің ең бай тіл екендігін, қазақ тілін өздерінің туған тіліндей қастерлеуге шақыру. Сайысқа татар, орыс ұлтының өкілдері қатысып, көркемсөз оқу, тілге байланысты мақал-мәтелдер айту, туған жер, туған өлке туралы сауалдарға жауап беру, сөзжұмбақ, өз өнерлерін көрсету шарттары бойынша сынға түсті.
Сайыс соңында әділқазылар алқасының шешімі бойынша І – орынды Каспий өңірі қазіргі заман колледжінің студенті А. Мақпузов, ІІ – орынды Абай атындағы №15 орта мектептің 9-шы сынып оқушысы А. Захарова, ІІІ – орынды Қ Дүтбаева атындағы гуманитарлық колледждің студенті Е. Тамбовцева жеңіп алды. Сайысты кітапхана директоры Қ. К. Қабиева қортындылап, алғыс хаттар мен сыйлықтар тапсырды.
