Ізгі - тілектер

Марианна Тэкс Чолдин қазақстандық «Бір ел – бір кітап» акциясының жемісті өтуін тілеген еді

2007 жылғы сәуірде Астанада өткен Халықаралық Оқу Конгресіне Чикагодағы акцияны ұйымдастырушылардың бірі, Иллиной университетінің (АҚШ) профессоры Марианна Тэкс Чолдин қатысқан болатын. Естеріңізге сала кетсек, «Бір ел – бір кітап» жобасының идеясы АҚШ-та өте танымал болған «Бір кітап, бір Чикаго» және «Егер Сиэтлдің бүкіл тұрғыны бір кітапты оқыса» деген кітапханалық жобаларға негізделген. Шартқа сәйкес бүкіл қала тұрғындары бір мезгілде бір шығарманы оқуға тиіс.

Марианна Тэкс Чолдин журналистерге берген сұхбатында, «Бір кітап, бір Чикаго» жобасының Қазақстанда да жалғасын тауып жатқанына қуанышты екенін жеткізді. Сол кезеңде «Бір ел – бір кітап» акциясы басталатындығы хабарландырылып жатқан еді. Ол барлық қазақстандықтардың ортақтаса оқуы үшін таңдалатын кітаптың қызықты болуына және акция барысында әр алуан пікірлер туғызатын көптеген дискуссиялар өткізуіне сәттілік тіледі.

Суретте (солдан оңға қарай): Марианна Тэкс Чолдин - Иллиной университетінің құрметті профессоры, Чикаго (АҚШ) және Пол Стойжес, FAIFE/IFLA комитетінің төрағасы, Лауборо университетінің профессоры, (Ұлыбритания).