сәуір – ҚР ҰАК Ашық есік күні

Бүгін ҚР Ұлттық академиялық кітапханасының құрылғанына 5 жыл толды. Осы алғашқы мерейтойға орай, кітапханада Ашық есік күні өтті. Орталықтағы кіреберісте әуезді ән, «5 жыл» белгісімен әсем безендірілген логотип, айнала толған шар, залдарда әр алуан әшекейлі көрмелер, сәнді киінген кітапханашылар өздерін құттықтауға келген оқырмандарын қуанышты көңіл-күймен қарсы алуда. Фанфарлар әуені. Оқырмандар ҚР Ұлттық академиялық кітапханасының бас директоры Р. А. Бердіғалиевамен, қонақтармен және кітапхана ұжымымен кездесуде.

Роза Аманғалиқызы жиналғандарды ҚР ҰАК мерекесімен құттықтап, келесіні атап көрсетті: «Дүниежүзілік кітап және авторлық құқық күні қарсаңында, яғни, 23 сәуірде Қазақстан Республикасының Ұлттық академиялық кітапханасын құру туралы Қаулы шықты. Бүгінде мұнда оқырмандарға жайлы жағдай жасалған... Біз Қазақстандық Ұлттық электронды кітапхана – ҚазҰЭК-ны іске қостық. Бірақ біздің алдымызда тұрған жоспарлар өте көп.... Осы жылғы 21 сәуірде АҚШ-тағы Конгресс кітапханасы негізінде ЮНЕСКО-ның Париждегі штаб-пәтерінде ашылған Бірінші Бүкіләлемдік электронды кітапхана каталогынан қазақстандық авторлардың кітаптарын да кездестіретін күн де алыс емес».

ҚР Мәдениет және ақпарат министрінің құттықтау сөзін ҚР МАМ Мәдениет комитеті Өнер басқармасының бастығы Б. Бөкебаев оқып берді. «Нұр-Отан» ХДП филиалының өкілі де құттықтап сөз сөйледі. Кітапхана оқырмандары атынан Астана қаласындағы №1 кәсіптік лицейдің тарих және қоғамтану пәндерінің мұғалімі В. Бегалинов, «Қазақ соқырлар қоғамы» қоғамдық бірлестігінің Астана қалалық филиалы басқармасының жетекшісі Х. Хамза құттықтады. Олар Ұлттық академиялық кітапхананың мүмкіндіктеріне жоғары баға беріп, қайырымды, білікті әрі әрдайы ілтипатпен қарайтын кітапханашылар қауымынының ынтымақтастығы үшін алғыс айтты.

Бұдан соң жүргізуші елордадағы №3 мектеп-лицейдің 6-шы «А» сынып оқушыларын ортаға шақырды. Бұл балалар кітапханамен бірге есейіп келеді. Осыдан бес жыл бұрын олар ҚР ҰАК салтанатты ашылуына қатысқан еді. Содан бастап кітапхананың жыл сайынғы құрметті қонақтары қатарында. Сол күні жастары 16-ға толған астаналық оқушылар Б. Жұмағұлов, А. Байтұр, Д. Қазынғапова және Қ. Абдрахманов салтанатты түрде оқырман билетіне қолжеткізді. Сөйтіп ҚР ҰАК-ның «жеті жүз мыңыншы қатысушы» сертификаты №59 орта мектептің мұғалімі әрі оқырман А. Әлімовке табыс етілді.

Мереке күнгі музыкалық бағдарлама бойынша кітапхана ұжымы мен ән авторы – сазгер Марат Омаров бірлесіп ҚР ҰАК әнұранын орындады. Әнұранның сөзін жазған – қазақстандық ақын Қайрат Жұмағалиев. Бұл күні аты әлемге мәшһүр Марат Омаров қонақтарға тағы да әсем әнін арнады.

Ашылу салтанатынан соң оқырмандар кітапханаға экскурсия жасап, көрмелер мен түрлі шараларды тамашалады.

«Кітапхананың жаңа форматы - 2009» көрмесі (көрме залы, 3-қабат) ҚР ҰАК тарихына арналған. Мұнда ҚР ҰАК алтын коллекциясы қорындағы фотоқұжаттар, дипломдар, кітаптар және дискілер, сондай-ақ кітапхананың бес жылдығы қарсаңында келіп түскен 61 құттықтау қойылған. Оқырмандар мен қонақтар Қазақстандық Ұлттық электронды кітапхана - ҚазҰЭК мүмкіндіктерімен жете танысып, «Бес жылдағы маңызды оқиғалар», «Он лайн ақпарат және электронды қызмет түрлері» тақырыптарындағы электронды тұсаукесерге куә болды. Бұдан бөлек, кітапхана залдарында тақырыптық кітап көрмелері ашылды: «Мағжан Жұмабаев», «Мәдени мұра» («Диалог» залы, 3-қабат),

«Сәнге енген тақырып – нано-технологиялар (көпшілік оқу залы, 4-қабат), «Қазақ тілі» (музыкалық мейманжай, 2-қабат), «Қазақстан өнері» (өнер залы, 4-қабат), «Қазіргі заманғы халықаралық саясат» (әлем әдебиеті залы, 4-қабат).

Мүмкіндігі шектеулі азаматтарға арналған залда «Жан сөзі» кітабы Дауыстап оқылды (М. Жұмабаев лирикасы бойынша).

Қатысушылар – «Қазақ соқырлар қоғамы» қоғамдық бірлестігінің Астана қаласындағы Басқарма филиалы мүшелері, көз мүгедектері. Олар ақынның «Өлең», «Жұлдызды - жүзік, Айды - алқа ғып берейін...», «Сүйемін», «Зарлы сұлу», «Гүлсім ханымға», «Бұлбұл», «Сүйгеніме», «Айрылғанда» тәрізді өлеңдерін мәнерлей оқыды. Сондай-ақ «Пророк» кітабының аудиожазбасы таңдалды. Залдағы мамандар М. Жұмабаевтың шығармашылығымен таныстырды, жиналғандар өзара пікір алмасты.

«Диалог» залында «Бір ел – бір кітап» акциясының жалпыұлттық сипаты» тақырыбында «дөңгелек үстел» өтті. Оған елордалық зиялы қауым өкілдері, студенттер мен мектеп оқушылары қатысты.

«Дөңгелек үстелді» ҚР ҰАК бас директоры Р. Бердіғалиева ашты. Модератор ретінде жазушы, «Бір ел – бір кітап» акциясын ұйымдастыру комитетінің мүшесі -Әкім Тарази құттықтау сөз сөйледі.

Шара барысында қаралған тақырыптар – «Акцияны жалпыұлттық деңгейге дейін көтеру үшін не істеуіміз керек?», «Акция идеясына үкіметтік және үкіметтік емес, сондай-ақ қоғамдық ұйымдардың назарын қалай тартамыз?», «Өткізілген акцияларды саралай отырып, оқу ісін ілгерілету жолдарын айқындау». ҚР Парламенті Мәжілісінің әлеуметтік мәдени даму комитетінің мүшесі Ж. Қ. Сүлейменов; Философия ғылымдарының кандидаты О. Ж. Темірбеков («Мағжанның махаббат лирикасы»); Филососфия ғылымдарының докторы Қ. М. Марданов («Мағжан лирик ақын ретінде»); Жазушы, «Нива» журналының бас редакторы В. Р. Гундарев; Мағжанның немере жиені С. Қ. Мүсәлімова; Петропавлдан келген жазушы, М. Жұмабаев шығармашылығын зерттеуші, Петропавл қаласының құрметті азаматы М. М. Қамғожин және басқалар баяндама жасады. Шара барысында екі басылымның тұсакесері өтті. Петропавлдағы Ғ. Мүсрепов атындағы қалалық балалар мен жасөспірімдер кітапханасының директоры Р. О. Қасымова М. Жұмабаевтың лирикасына арналған «Алқа» фотоальбомы туралы әңгімеледі. «Кітап жаршысы» газетінің бас редакторы Қанат Қайым «Сен сұлу» атты жаңа өлеңдер жинағымен таныстырды. Акцияға арналған бұл жинақты «Ол-жас» Баспасы» шығарды. Жинаққа автордың қазақ және орыс тілдеріндегі өлең-жырлары енгізілген. Бұл кітаптың басты ерекшелігі – төңкерме басылым үлгісінде. Бұл - әрине, игі бастама! Акция аясы одан әрі кеңейе түспек, кітаппен қолдау жағы да қамтылады. Сыршыл ақынның нәзік жырларымен таныс ететін бұл жинақ - кітапханашылардың, оқытушылардың және басқа да мамандардың акция бойынша жұмыс жүргізулеріне үлкен қолғабыс.

Ашық есік күніндегі іс-шаралар көрінісі - осындай. Оқырмандарға буклеттер, визиткалар, үнпарақтар таратылды. 23 сәуірде кітапханаға барлығы мың жарымға жуық адам келді.

Кітапхананың 5-жылдығына арналған Ашық есік күніндегі шаралар келесі БАҚ көрініс алды: «Қазақпарат» агенттігі, Қазақстан ТВ, Эра ТВ, Хабар, Астана ТВ, Қазақ радиосы, «Егемен Қазақстан», «Казахстанская правда», «Ел», «Республика kz, «Алаш Айнасы», «Альянс kz» газеттері.