Қолданылу ережесі

«АСТАНА ҚАЛАСЫНДАҒЫ ҚАЗАҚСТАН РЕСПУБЛИКАСЫ ҰЛТТЫҚ АКАДЕМИЯЛЫҚ КІТАПХАНАСЫ» РММ

ПАЙДАЛАНУ ЕРЕЖЕСІ

1.Жалпы ережелер

1.1. Астана қаласындағы Қазақстан Республикасы Ұлттық академиялық кітапханасының (бұдан былай – Кітапхана) осы Пайдалану ережесі (бұдан әрі - Ереже) Қазақстан Республикасының Конституциясына, Қазақстан Республикасының Азаматтық кодексіне, Қазақстан Республикасының «Мәдениет туралы», «Авторлық құқық пен аралас құқық туралы» заңдарына, Кітапхана Жарғысына, Қазақстан Республикасы Мәдениет және қоғамдық келісім министрлігінің 2002 жылдың 8 мамырындағы №118 бұйрығымен бекітілген «Қазақстан Республикасы кітапханалық мекемелерінің қызметі туралы ережеге» сәйкес құрастырылған.

1.2. Осы Ереже кітапхана қорын пайдаланудың, қызмет түрлері мен оның көрсетілу шарттарының тәртібін, сонымен қатар пайдаланушы мен Кітапхана арсындағы өзара қарым-қатынастарды реттейді. Кітапхана қоры Қазақстан Республикасының мемлекеттік меншігі болып саналады әрі мемлекет бақылауында болады.

1.3. Кітапхананы пайдалану ақысыз. Кейбір жекелеген жұмыс түрлері мен қосымша қызметтерге алынатын ақы Қазақстан Республикасы Үкіметінің 2009 жылғы 20 сәуірдегі «Мемлекеттік кітапханалардың, мемлекеттік мұражайлар мен мұражай-қорықтардың тауарларды (жұмыстарды, қызметтерді) өткізу жөніндегі ақылы қызмет түрлерін көрсетуден түскен ақшаны жұмсау ережесін бекіту туралы» № 555 Қаулысының (Қазақстан Республикасы ҮҚАЖ, 2009 ж., № 20, 176 бет) негізінде жасалған, ҚР МАМ Мәдениет комитетінің 2011 жылғы 27 маусымдағы №153 бұйрығына сәйкес дайындалған «Ақылы қызмет туралы» ереже мен Астана қаласындағы ҚР ҰАК «Ақылы қызметтерінің тізіміне» сәйкес айқындалады.

1.4. Жеке және заңды тұлғалар осы ережеде айқындалған тәртіпке орай кітапхананы пайдалану құқығына ие.

2. Кітапхана құқығы мен міндеттері

2.1. Кітапхана құқықты:

2.1.1. Жеке және заңды тұлғалармен жасалған келісім-шарттар негізінде кітапханалық қорды пайдаланудың шарттарын айқындауға;

2.1.2. Қазақстан халқының мәдени игілігін сақтауды қамтамасыз ету жайлы заңнамада қарастырылған жайттарға сәйкес, сонымен қатар осы Ережемен айқындалған жағдайларға орай қорды пайдалануға шектеу қоюға;

2.1.3. Пайдаланушының кітапханаға келтірген зиянының орнын толтыру мақсатында өтемақы түрлері мен мөлшерін айқындауға.

2.2. Кітапхана міндетті:

2.2.1. Оқырмандардың өз құқықтарын пайдалануын қамтамасыз ету мен оларға көрсетілетін қызметті жүзеге асыруға;

2.2.2. Оқырмандардың кітапхана қоры мен ақпараттық ресурстарына қолжетімділігін қамтамасыз етуге;

2.2.3. Пайдаланушылардың ауызша және жазбаша ұсыныстарын есепке ала отырып, кітапханалық, анықтама-библиографиялық және ақпараттық қызмет көрсетуді ұдайы жетілдіруге;

2.2.4. Қосымша қызметтердің жаңа түрлерін енгізуге, қашықтықтағы пайдаланушыларға қолжетімді ақпараттық ресурстардың тізімін кеңейтуге;

2.2.5. Пайдаланушылардың барлық топтарын қорға түскен жаңа басылымдар жайлы, жұмыс режимінің өзгеру барысы мен қызмет көрсету тәртібі туралы жедел ақпаратпен хабардар етуге;

2.2.6. Әдебиеттер мен ақпаратты іріктеуде, каталогтарды, анықтамалық-іздеу аппараттарын көрсетуде ауызша және жазбаша кеңестер беру арқылы көмек көрсетуге, кітапхана қорын пайдалану арқылы көрмелер ұйымдастыруға, басқа кітапханалардың ақпараттық ресурстарына қолжетімділікті қамтамасыз етуге;

2.2.7. Пайдаланушыға қажетті құжат кітапхана қорында болмаған жағдайда кітапханааралық абонементті (КАА), ғаламтор мүмкіндігі мен құжаттарды электронды жеткізу (ҚЭЖ) қызметін пайдалануға;

2.2.8. ҚР МАМ Мәдениет комитетінің бұйрығымен бекітілген қолданыстағы бағатізбенің негізінде (1 қосымша) пайдаланушыларға ақылы қызметтер көрсетуге міндетті.

3. Кітапхана пайдаланушыларының

құқықтары мен міндеттері

3.1. Пайдаланушылар құқықты

3.1.1. Кітапхана қорында белгілі бір құжаттың бар-жоғы жайында ақпаратты тегін алуға;

3.1.2. Каталог жүйесі мен кітапханалық ақпараттандырудың өзге де жолдары арқылы кітапхана қорының құрамы жайлы толық ақпарат алуға;

3.1.3. Кітапхана қорынан қажетті құжатты уақытша пайдалануға тегін алуға;

3.1.4. Кітапханааралық абонемент арқылы өзге кітапханалардан құжаттар мен олардың көшірмесін алуға;

3.1.5. МЭКҚ - ҚазҰЭК порталы www.kazneb.kz арқылы көрсетілетін электронды қызметтерді пайдалану үшін логин мен пароль алуға;

3.1.6. Тіркеу бөлімінен алдын-ала рұқсат етілген белгі қойдырып, қызмет көрсету залдарында өзіне қажетті құрал-жабдықтары: ноутбуктерді, жеке қалта компьютерлерін, өз кітаптары мен журналдарын пайдалануға;

3.1.7. Кітапхана қабырғасында өтетін іс-шараларға қатысып, атсалысуға;

3.1.8. Кітапханада көрсетілетін өзге де қызмет түрлерін, сонымен қатар ақылы қызмет түрлерін пайдалануға;

3.1.9. Құжаттарды ақпарат тасымалдағыштардың кез-келген түріне көшіруге; Көшіру кітапхана жабдықтары арқылы жасалады.

3.1.10. Мүмкіндігі шектеулі оқырмандарға ғаламторды пайдалану тегін. Көшірме жасау қызметі, құжаттарды принтерде басып шығару, тифло-техникалық құрал-жабдықтар мен компьютердегі мәтіндерде өз бетімен жұмыс жасау үшін электронды құралдарды пайдалану рұқсат етілген.

3.1.11. Даулы жағдайларда кітапхана әкімшілігіне оқырман билетінің номерін міндетті түрде көрсете отырып, жазбаша түрде өтініш, шағым түсіруге; Анонимді өтініштер қарауға жатпайды («Жеке және заңды тұлғалардың өтініштерін қарау тәртібі туралы» Қазақстан Республикасы Заңының 5 бабына сәйкес).

3.2. Пайдаланушылар міндетті

3.2.1. Кітапханаға келген сайын тіркеу бөлімінде оқырман билетін көрсету арқылы кітапханаға кіруі мен шығуын белгілетуге;

3.2.2. Мекемеден тыс күзет қызметкерінің немесе кезекші кітапханашының талаптарын орындап, пакет, папка, әйелдер сумкасын тексеруге беруге;

3.2.3. Кітапхана қорынан алынған баспалық шығармалар мен мультимедиялық және өзге де құжаттарға ұқыпты қарауға, басылым беттерінде белгі қалдырмау, жұлып, жыртып алмау, беттерін қайырмау, лазерлік дискілердің сыртын сызбау және кітапханадан құжаттарды алып шықпауға. Қандай да бір кемшіліктерді байқаған жағдайда бірден кезекші кітапханашыға хабарлауға;

3.2.4. Кітапханада берілген ақпаратты анағұрлым көлемді немесе жүйелі көшіру үшін, шығармаларды жүйелі жабдықтау мен түрлі формада коммерциялық мақсатта тарату үшін пайдаланбауға.

3.2.5. Өздеріне жұмыс жасау үшін берілген компьютерлік құрал-жабдықтарға ұқыпты қарауға, компьютер жұмысында ақау пайда болған жағдайда кезекші кітапханашыға айтуға міндетті. Компьютердің кез-келген аппараттық және бағдарламалық конфигурациясын өз бетімен өзгертуге тиым салынады.

3.2.6.  Алып-салынатын тасымалдағыштарды кезекші кітапханашының компьютерінде (флэш-порттар, CD/DVD) міндетті түрде вирустың бар-жоқтығына тексеруге;

3.2.7. Қоғамдық орындарда мінез-құлық ережелерін сақтауға;

3.2.8. Төтенше жағдай (өрт, апат, террористік акт қаупі) туындағанда кітапхана қызметкерлерінің, мекемеден тыс күзет және өрт қызметі қызметкерлерінің талаптарына бағынуға;

3.2.9. Кітапханаға кірген бетте гардеробқа сырт киімін, 20 х 10 х 7 см. мөлшеріндегі әйелдер сумкасынан өзге сумка, пакеттерін, басқа да заттарын тапсыруға;

3.2.10. Кіретін қоңыраулар үшін ұялы телефонды дыбыссыз режимге қоюға, оқу залдарында ұялы байланысты қолданбауға;

3.2.11. Кітапхананың осы пайдалану ережесін сақтауға міндетті.

3.3. Пайдаланушыларға рұқсат етілмейді:

3.3.1. Кітапхана қорынан пайдалану мақсатында алған құжаттарын басқа тұлғаға беруіне;

3.3.2. Кітапханадан оның кітап қорына тиесілі баспа өнімдері мен басқа да құжаттарды алып шығуына; Кітапханадан шығарда оқырманнан ҚР ҰАК-қа тиесілі құжаттар табылса, күзет қызметкерлері аталған құжаттарды алып, оқырман билеті және жазбаша рапортпен бірге дирекцияға береді.

3.3.3. Кітапхана құжаттарын көшіру үшін фотоаппарат, видеокамера ұялы байланыс құралдарын пайдалануға;

3.3.4. Кітапханаға суық, газды, отпен атылатын қаруларды, оқ-дәрілерді, жарылғыш және улы заттарды алып кіруіне;

3.3.5. Қазақстан Республикасының «Халық денсаулығы және денсаулық сақтау жүйесі туралы» Кодексіне орай қоғамдық орындарда темекі шегуге тиым салған ережені бұзуына; (тәртіп бұзушыларға ықпал ету шарасы ретінде Әкімшілік құқық бұзушылық туралы Қазақстан Республикасы Кодексінің 336-1 бабында қарастырылған айыппұл салынады).

3.3.6. Кітапхананың оқу залдарындағы тыныштықты бұзуына;

3.3.7.Әкімшіліктің рұқсатынсыз кітапханада хабарландыру, жарнама, жарнама-коммерциялық сипаттағы өзге де материалдарды ілуіне;

Ескерту:

Пайдаланушылар аталған ережелерді бұзғаны үшін 1 айдан 1 жылға дейін кітапхананы пайдалану құқығынан айрылады.