Мәдениет және ақпарат министрлігінің қолдауымен Ұлттық академиялық кітапханада Қазақстанның Еңбек сіңірген қайраткері, көрнекті жазушы Жұмабай Шаштайұлының мемлекеттік тапсырыспен шыққан төрт томдық толық шығармалар жинағының таныстырылымы өтті.

Іс-шара аясында биыл туғанына 75 жыл толған жазушы Жұмабай Шаштайұлына арналған «Жылдар мен жолдар...» атты иллюстрациялық-кітап көрмесі қойылды. Жиналғандарға жазушының шығармашылық жолы жайлы арнайы бейнеролик ұсынылды. Сондай-ақ, қаламгердің көркем туындыларына шолу жасалып, әдебиеттегі жолы мен шығармашылық әлемі жайлы жылы естеліктер айтылды.

Әдеби іс-шараны алаштанушы ғалым, филология ғылымдарының докторы Айгүл Ісмақова жүргізді.

Таныстырылымда алғаш сөз алған Қазақстан Республикасының Мәдениет және ақпарат министрлігі Архивтер, құжаттама және кітап ісі комитетінің төрағасы Рустам Әли, кітап басу ісіндегі мемлекет тарапынан жасалып жатқан қолдау шараларына тоқталып өтті. Ол өз сөзінде қазіргі қазақ прозасында өзіндік қолтаңбасын қалыптастырған қаламгер Жұмабай Шаштайұлының төрт томдық толық шығармалар жинағы — тек әдеби қауым үшін ғана емес, ел руханияты үшін де маңызды еңбек екенін атап өтті.

Шараға жазушының қаламдас әріптестері, әдебиеттанушылар, қоғам қайраткерлері, журналистер, мәдениет және өнер саласының өкілдері, студенттер мен оқырмандар қауымы қатысты. Таныстырылым аясында қаламгердің прозалық және публицистикалық еңбектерінен тұратын томдарға шолу жасалып, оның қазақ әдебиетіндегі орны мен шығармашылық жолы туралы мазмұнды пікірлер айтылды.

Жинаққа енген туындылар — Жұмагүл Шаштайұлының бірнеше онжылдықты қамтыған әдеби еңбегінің жемісі. Оның шығармаларында қазақы болмыс, ұлттық құндылықтар, адамгершілік, өмір шындығы көркем бейнеленген.

Кітаптар шығарма желісімен салынған иллюстрациялық суреттермен безендірілген. Жинақ 3 000 дана таралыммен шығып, республиканың барлық кітапханаларына тарады.