Бүгін ҚР Ұлттық академиялық кітапханасында ҚР Жазушылар және Журналистер одақтарының мүшесі, Қазақстанның Құрметті журналисі, «Ерен еңбегі үшін» медалінің иегері Мүсіркеп Сейдахметтің                                       «Жоқшы» кітабының таныстырылымы және «Кәусарын жырдың атқылап, тас жарып шыққан қайнармын» атты шығармашылық кездесу кеші өтті.

Ақынның 70 жас мерейтойы қарсаңында жарыққа шыққан  «Жоқшы» атты жыр жинағына туған ел мен жерге деген сүйіспеншілігі, ұлттық болмысқа, тарихи жадыға деген сағынышы, рухани ізденісі мен адамдық парасат туралы толғаныстары топтастырылған. «Жоқшы» — қазақтың жоғын жоқтап, барын бағалауға үндейтін сыршыл туынды.

Әдеби кешті ақын, Халықаралық «Шабыт» фестивалінің лауреаты Серік Сағынтай жүргізді.

ҚР Мәдениет және ақпарат министрлігі Архив, құжаттама және кітап ісі комитетінің Кітап ісі басқармасының басшысы Алмас Мырзахмет ақынға министрліктің құттықтау хатын табыстады. Қазақстан Жазушылар одағы Астана қалалық филиалының төрағасы, ақын Бауыржан Бабажанұлы мерейтой иесіне  одақтың басқарма төрағасы Мереке Құлкеновтің құттықтау хатын оқып, иығына жапан жапты.

Шараға қоғам қайраткерлері, қаламгерлер, журналистер мен оқырмандар қатысты.