Әдебиеттанушы С. Абдрахмановтың «Алып Абай. Конгениальность. Congeniality» атты кітабының таныстырылымы

2025 жылғы 5 желтоқсан күні Қазақстан Республикасының Ұлттық академиялық кітапханасында Ұлы Абайдың 180 жылдығына арналған іс-шаралардың қорытындысы негізінде Мемлекеттік сыйлықтың лауреаты, көрнекті әдебиеттанушы Сауытбек Абдрахмановтың «Алып Абай. Конгениальность. Congeniality» атты кітабының тұсаукесері өтті.

«Алып Абай» кітабы – тұтастай Абай аудармашылығына арналған тұңғыш қомақты еңбек. Осы уақытқа дейін Абай аудармашылығы туралы 1954 жылы бір ғана кітап – Зәки Ахметовтің «Лермонтов и Абай» атты зерттеуі жарық көрген. Ол еңбекте Абайдың Лермонтовтан жасаған аудармалары ғана талданған.

Бұл кітапта Абай аудармалары түгел қарастырылған: Пушкин, Лермонтов, Крылов, Гете, Байрон, Шиллер, Мицкевич, Бунин, Дельвиг, Полонский және басқа авторлар. Бірде-бір өлең назардан тыс қалмаған. Кітап үш тілде – қазақ, орыс және ағылшын тілдерінде жарық көрді.

Кітапта Абай шығармашылығының әлемдік әдебиетпен үндестігі, көркемдік табиғаты және рухани миссиясы жан-жақты зерделенеді.

«Биылғы Абайдың 180 жылдығына орай жарыққа шығып, оқырманына жол тартқалы отырған бұл кітап абайтануда ақынның аудармашылығын зерттеудегі сүбелі үлес болмақ», – деді шараның модераторы, белгілі айтыскер ақын, филология ғылымдарының докторы, Мәжіліс депутаты Аманжол Әлтай.

Шараға Мемлекет және қоғам қайраткерлері, Сенат және Мәжіліс депутаттары, ҚР Мәдениет және ақпарат министрлігінің өкілдері, зиялы қауым, танымал қаламгерлер, абайтанушылар, оқытушылар мен студенттер қатысты.