ҚР Ұлттық академиялық кітапханасында «Qasymkitap» баспасының қолдауымен және «Ұлағат» оқырман клубының ұйымдастыруымен қазақ прозасының көрнекті өкілі, ұлт жазушысы Төлен Әбдікпен тағылымды кездесу өтті.

Кеш барысында жазушы оқырмандармен еркін форматта сұхбат құрып, шығармашылық жолындағы ізденістері, көркемдік әлем мен қазіргі қазақ әдебиетінің жай-күйі туралы өз ойларын ортаға салды. Жастардың сауалдарына шынайы әрі мазмұнды жауап беріп, қаламгерлік жолдағы бай тәжірибесімен бөлісті.

Төлен Әбдіктің шығармаларына тән терең философиялық мазмұн, адам жанын тереңнен тануға бағытталған иірімдер, рухани ізденістер – кездесу барысындағы негізгі талқылау өзегіне айналды.

Шара аясында жазушы оқырмандарына қолтаңба беріп, көрермен қауыммен естелік суретке түсті. Сонымен қатар, «Qasymkitap» баспасы мен «Ұлағат» клубы жаңа жобаларын таныстырып, алдағы жоспарларымен бөлісті.

Бұл кеш әдебиет пен руханияттың үнін, ақиқат пен ардың жолын ту еткен қаламгермен әсерлі жүздесу болды.