Пост релиз

 «Мәдени дипломатия: кітапханалардың патриотизм мен азаматтық бірегейлікті қалыптастырудағы рөлі»

          23 қазан күні сағат 11.00-де Қазақстан Республикасының Ұлттық академиялық кітапханасында «Мәдени дипломатия: кітапханалардың патриотизм мен азаматтық бірегейлікті қалыптастырудағы рөлі» атты халықаралық дөңгелек үстел өтті.

Модератор – Қазақстан Республикасының Ұлттық академиялық кітапханасының басшысы Күміс Сейітова. Ол конференцияға қатысушыларды алдағы кәсіби мерекелер – Кітапханашы күні және Республика күнімен құттықтап, кітапханалардың ағартушылық, мәдени және білім беру бастамалары арқылы халықтар арасындағы диалог алаңы ретінде ұрпақтар мен мәдениеттерді тоғыстырып отырғанын атап өтті.

Дөңгелек үстелдің қатысушыларына құттықтау сөздерін шетелдік және отандық мәртебелі қонақтар жолдады: Владимир Йовичич, Қазақстан Республикасындағы Сербия Республикасының Төтенше және Өкілетті Елшісі,  Вики Макдональд,  Халықаралық кітапханалар қауымдастықтары мен мекемелер федерациясының (ИФЛА) президенті, Вадим Дуда, Ресей мемлекеттік кітапханасының бас директоры (Мәскеу қ.), Ғазиза Нұрғалиева, Қазақстан Республикасының Ұлттық кітапханасының директоры, Марина Захарченко, Ресей мемлекеттік шетел әдебиеті кітапханасының (М.И. Рудомино атындағы, Мәскеу қ.) бас директоры, Ольга Ульданова, Татарстан Республикасының Қазақстан Республикасындағы Уақытша өкілдігі басшысының орынбасары.

          Қонақтар халықаралық кәсіби алаңның жоғары деңгейде ұйымдастырылғанын атап өтіп, мұндай кездесулер мәдени мұраны сақтау, оқуды насихаттау және қоғамның рухани құндылықтарын қалыптастыру бағытында өзара іс-қимылды нығайтуға мүмкіндік беретінін айтты. Конференция барысында спикерлер патриоттық, рухани және экологиялық тәрбиенің өзекті бағыттарын қамтыған мазмұнды баяндамалар ұсынды: «Республика күні – мемлекеттің дамуы  мен өркендеуіне ұмтылудың символы» – Жанна Қыдыралина, Л.Н. Гумилев атындағы Еуразия ұлттық университетінің профессоры, ғылым докторы; «Жастар арасында патриоттық сана қалыптастырудағы кітапханалардың мүмкіндіктері» – Гүлмира Нұржанова, педагогика ғылымдарының кандидаты, доцент, Қазақ ұлттық қыздар педагогикалық университетінің «Ақпараттық технологиялар және кітапхана ісі» кафедрасының меңгерушісі; «Жоғары мәдениет – зор жауапкершілік: университеттің білім беру экожүйесіндегі академиялық кітапхананың рөлі» – Жұлдыз Оразымбетова, Назарбаев Университеті кітапханасының пайдаланушыларға қызмет көрсету бөлімінің жетекшісі.

         Шетелдік спикерлер – Парвана Курбанова, Әзербайжан Республикасының Ұлттық кітапханасының электронды-ақпараттық қызмет көрсету секторының меңгерушісі, Игорь Горбатов, Ресей мемлекеттік кітапханасының арнайы жобалар жөніндегі директоры, Атайхан Ашамаев, Қырғыз Республикасындағы К. Баялинов атындағы балалар мен жасөспірімдерге арналған республикалық кітапхананың халықаралық байланыстар және қоғаммен байланыс бөлімінің басшысы – тарихи жадыны сақтау, мемлекетаралық ынтымақтастықты дамыту және мәдени мұраны танымал етуге бағытталған негізгі бастамалар туралы баяндады.

          Іс-шара пікір алмасуға, кәсіби диалог пен ортақ бастамаларды қалыптастыруға арналған тиімді алаңға айналды. Ол гуманитарлық және ғылыми ынтымақтастықты дамытуға, сондай-ақ елдер арасындағы мәдени байланыстарды нығайтуға бағытталды.

          Халықаралық дөңгелек үстел офлайн және онлайн форматтарда өтті. Оған халықаралық кітапханалық қауымдастықтың өкілдері, дипломатиялық корпус мүшелері, Астана қаласы мен республикадағы академиялық және мәдени мекемелердің өкілдері, шығармашылық зиялы қауым мен кітапхана оқырмандары қатысты. Іс-шараға жалпы саны 300-ден астам қатысушы жиналды.