Кітапханада тарихшы-ғалым, академик Кеңес Нұрпейісұлының 90 жылдығына орай «Кеңес Нұрпейісұлы – қазақ тарихын зерттеуші ғалым, академик» атты дәріс өтті.

Кеңес Нұрпейісұлы — Қазақстан тарихы мен Алаш қозғалысын зерттеуде аса зор үлес қосқан ғалым. Ол өз зерттеулерінде тек тарихи оқиғаларды баяндап қана қоймай, олардың терең мәнін, ұлттық рух пен тәуелсіздік үшін күрестің маңызын айқындай білді.

Дәрістің мақсаты – академик Кеңес Нұрпейісұлының отандық тарих ғылымына,  Алаш қозғалысы тарихын зерттеуге қосқан зор үлесін және оның өмір жолын тереңірек таныстыру.

Дәріс барысында Кеңес Нұрпейісұлының зерттеулеріне сүйене отырып, ХХ ғасырдағы Қазақстан тарихының өзекті мәселелері, оның ішінде ұлттық идея, тәуелсіздік жолындағы күрес, Алаш арыстарының рөлі мен олардың қызметінің тарихи маңызы талқыланды.

         Дәрісті тарих ғылымдарының докторы, профессор Озғанбаев Өмірзақ Озғанбайұлы жүргізді. Іс-шараға тарихшы - ғалымдар, Мемлекеттік тарих институтының ғылыми қызметкерлері, Л.Гумилев атындағы Еуразия Ұлттық университетінің профессорлық-оқытушылар құрамы, магистранттар мен докторанттар, кітапханашылар, оқырмандар қатысты.

         2017 жылы кітапхана қорына тарих ғылымдарының докторы, профессор Кеңес Нұрпейісұлының туыстары жеке кітапханасынан 3193 дана кітаптар жинағын сыйға тартты. Барлық кітаптары Ұлттық академиялық кітапхананың электрондық катологына енгізілді және олар кітапхананың nabrk.kz сайтында барлық оқырмандарға қолжетімді.