Қазақстан Республикасының Мәдениет және ақпарат министрлігінің қолдауымен Қ. Қуанышбаев атындағы Қазақ Ұлттық музыкалық драма театрында Қазақстанның халық жазушысы Әбіш Кекілбаевтың 85 жылдығына арналған «КЕМЕЛ ТҰЛҒА КЕЛБЕТІ» атты халықаралық форумы өтті.

       Форум аясында Әбіш Кекілбайұлының өмірі мен шығармашылығына арналған фото және кітап көрмесі ұйымдастырылды. «Әбіш Кекілбаев әлемі» атты көрмеге қаламгердің қолжазбалары,публицистикалық мақалалары, кітаптары, зиялылардың қаламгер туралы айтқан естеліктері, ой–толғаулары, мақалалары, халықаралық ғылыми-практикалық конференция материалдары, сондай-ақ, жазушының түрік, шетел тілдеріне аударылған жинақтары,фотосуреттері қойылды.

         Одан соң Ә. Кекілбаевтың «Мазмұндама» баспасынан жарық көрген «Дәурен кешкен» кітабының және түрік тілінде жарық көрген «KUY» кітабының (аудармашы Ашур Өздемир) таныстырылымдары өтті.  

         Халықаралық шараның мақсаты – заңғар жазушының әдебиет әлеміндегі алар орнын, білімдарлығы мен азаматтық болмысын айшықтау.

         Шара «КЕМЕЛ ТҰЛҒА КЕЛБЕТІ» атты  халықаралық форуммен жалғасты. Рухани кешті мемлекет және қоғам қайраткері  Сауытбек Әбдірахманов жүргізді.

         Форумда  ҚР Мәдениет және ақпарат министрлігі архив, құжаттама және кітап ісі комитетінің төрағасы Рустам Али министр Аида Балаеваның лебізін жеткізді. Онда жазушының суреткерлік шеберлігі, қоғам алдындағы азаматтық бейнесі мен кештің маңыздылығы айтылған.

         Кеш қонағы – халық жазушысыТөлен Әбдік Кекілбаевтың әдебиет әлеміндегі тамырын тереңнен тартқан таным, телегей-теңіз білім,  бай мұрасы жайлы баяндады.

         Одан соң қонақтар Жантөрин атындағы Маңғыстау облыстық музыкалық театры сахналаған Ә.Кекілбаевтың «Шыңырау» спектаклін тамашалады.

         Халықаралық шараға  Мемлекет және қоғам қайраткерлері, шығармашылық зиялы қауым өкілдері, БАҚ өкілдері қатысты.