Алтын көпір: Қазақстан және Испания

ҰЛТТЫҚ АКАДЕМИЯЛЫҚ КІТАПХАНАҒА 1000 КІТАП

ҚР Ұлттық академиялық кітапханасына «Фолиант» баспасы мен Испания елшілігі 1000 кітап сыйға тартты.

Бұдан бұрын  «Фолиант» баспасы 2024 жылдың мамыр айында Алматы қаласындағы Ұлттық кітапханаға 1000 кітап сыйға тартқан еді. Осы дәстүрді жалғастыра отырып, «Фолиант» баспасы қазақ классик жазушыларының шығармаларын, әлем әдебиетінің озық туындыларын, үздік шетел әдебиеті мен  нон-фикшн жанрындағы кітаптармен қатар, балаларға арналған сан түрлі кітаптарды ҚР Ұлттық академиялық кітапханасына сыйлады. Оның ішінде Испан елшілігі ұсынған испан тіліндегі бірқатар кітаптар да бар.  Осылайша  «Фолиант» баспасы кітап оқитын ұлт болу үшін кітапхана жұмысына өз тарапынан қолдау көрсетуде.

Аталмыш іс-шара барысындаИспания Корольдігінің Қазақстандағы Елшісі Луис Франсиско Мартинес «Фолиант» баспасының директоры Нұрлан Сәрсенбіұлы Исабековке Испания Корольдігінің католиктік Изабелла орденін табыс етті.

Католиктік Изабелла ордені – ғылым, мәдениет және білім саласындағы халықаралық деңгейде елеулі жетістіктерге қол жеткізген тұлғаларға берілетін жоғары марапаттардың бірі.Бұл марапат – Нұрлан Исабековтің баспа саласына сіңірген еңбегінің халықаралық деңгейде танылуы және Қазақстан мен Испания арасындағы мәдени және әдеби байланыстарды нығайтуға қосқан үлесінің нәтижесі.

Шараны көрнекті жазушы, Қазақстанның еңбек сіңірген қайраткері Әлібек Асқаров жүргізді. ҚР Ұлттық академиялық кітапханасының директоры Ғазиза Құдайбергенқызы «Фолиант» баспасы мен Испания елшілігіне бүгінгі қолдаулары үшін алғысын білдірді.

Шараға зиялы қауым өкілдері мен шетелдік қонақтар, БАҚ өкілдері қатысты.