Бүгін Қазақстан Республикасы Ұлттық ғылым академиясының академигі, филология ғылымының докторы, профессор Шерубай Құрманбайұлының 60 жас мерейтойына орай    «Алаш көсемі және ұлт тілі», «Жаңа атаулар мен қолданыстар сөздігі», «Alaş ve Terminoloji»,, «Абай тілі: көне сөздер мен сирек қолданыстар», «Тілтанушы» кітаптарының таныстырылымы өтті.

     Ғылыми жиынды Халықаралық «Қазақ тілі» қоғамының президенті Рауан Кенжеханұлы жүргізіп, Шерубай Құрманбайұлының еңбектері туралы айтып өтті. Қазақстан Республикасы Президентінің кеңесшісі, ҚР ҰҒА академигі, филология ғылымының докторы, профессор Бауыржан Омарұлы Қазақстан Республикасының Президенті Қасым-Жомарт Кемелұлының құттықтау хатын жеткізді.

     Шерубай Құрманбайұлы: «Біз ғалымдар елдің алдында жауаптымыз. Сол себепті атқарған жұмыстарымыз туралы мәлімет бере кетсем»-деп еңбектері туралы әр кітапқа арнайы тоқталып, таныстырып өтті.

     Кеш барысында жиналған қауым «Алаш көсемі және ұлт тілі», «Жаңа атаулар мен қолданыстар сөздігі», «Alaş ve Terminoloji», «Абай тілі: көне сөздер мен сирек қолданыстар» кітаптарының тұсауын кесті. Сондай-ақ шара барысында академик Шерубай Құрманбайұлының өмірі мен ғылыми-педагогтік, мемлекеттік және қоғамдық қызметі туралы әріптес ғалымдардың, достары мен ізбасар шәкірттерінің жазған «Тілтанушы» атты жинақ оқырмандарға таныстырылды.

     Филология ғылымының докторы, профессор, Қожа Ахмет Ясауи атындағы Халықаралық қазақ-түрік университеті Түркітану институтының директоры Шәкір Ыбыраев, елші-дипломат, экс-сенатор, филология ғылымының докторы, профессор Әділ Ахметов, филология ғылымының докторы, профессор Мұрат Сабыр, ҚР ҰҒА академигі, филология ғылымының докторы, профессор Кәрімбек Құрманәлі  және тағы да басқа әр өңірден келген ғалымдар  сөз сөйлеп, академиктің ғылымдағы жетістіктеріне тоқталды. Қазақстан Республикасы Парламенті Сенатының депутаты Руслан Рүстемұлы жылы лебізін  білдіріп, иығына шапан жапты.

     Кітап таныстырылымын Қазақстан Республикасы Ұлттық ғылым академиясының академигі, филология ғылымының докторы, профессор Шерубай Құрманбайұлы қорытындылап, келген қонақтарға алғысын жеткізді.