Кітапханада келер жылы оқырмандарға қолжетімді электронды мәліметтер қорларын ұсыну мақсатында көлемді электронды базалармен танысу жұмыстары жүргізілуде.

Кеше кітапханада Амстердамдағы әлем бойынша ең ірі төрт ғылыми баспаның бірі Elsevier баспасының ғылыми әдебиеттер базасын таныстыру шарасы өтті.  

Scopus (Elsеvier) әлемдегі ең ірі 18 000 астам ғылыми техникалық журналдарды, шамамен 4 000 халықаралық баспаларды индексациялайтын бірегей реферативті ақпараттар базасы. Күнделікті жаңа ақпараттармен толықтырылып отыратын Scopus ақпараттар базасы жетекші басылымдардың бірінші номерінен бастап жинақ жасаған. Ғылыми мақалаларды іздеуде таптырмас көмекші құрал бола алады және барлық қолжетімді мақалалардың қысқаша мазмұндарын ұсынады. Аталмыш база Ұлттық басылым арқылы кітапхана оқырмандары үшін де тегін, қолжетімді болмақ.

Таныстырылымға компания өкілдері - Самер Гамал - Elsevier Шығыс Еуропа, Таяу Шығыс Және Африка және Орталық Азия елдерінің аймақтық директоры, Айхан Сарачоглу - Elsevier Түркия және Орталық Азия елдерінің аймақтық өкілі, Informascope аймақтық директоры, Elsevier  баспасынын Орталық Азия өкілі, аудармашы Бағдаулет Ерханов, сондай-ақ кітапхана басшысы Ғазиза Құдайбергенқызы және кітапхана қызметкерлері қатысты.

Айхан Сарачоглу  жиналғандарға электронды базаның барлық құрылымы мен мүмкіншіліктерін жан-жақты таныстырды.