Тұңғыш бард ақын Табылды Досымовтың шығармашылығына арналған кеш өтті

2023 жылы 3 қарашада Қазақстан Республикасының Ұлттық академиялық кітапханасында қазақтың тұңғыш бард-ақыны Табылды Досымовтың шығармашылығына арналған «Биіктік» атты әдеби-сазды кеші өтті. Кеш аясында ақынның «Із тастап аққан бір жұлдыз....»  кітабының тұсауы кесіліп, оқырмандарға жол тартты.

Қазақтың тұңғыш бард ақынын еске алуға арналған шығармашылық кешке жары  Қарлығаш Ибатова, ұлы Абыл Досымов, ҚР Президентінің кеңесшісі Бауыржан Омаров, Арман Сқабылұлы, Елена Әбдіхалықова бастаған достары, Бауыржан Бабажанұлы, Дәулеткерей Кәпұлы бастаған ақындар, «Табылды Досымов атындағы қордың» жетекшісі Бижан Қалмағанбетов және осы кешке арнайы Атыраудан келген делегация Әлия Дәулетбаева, Бақытгүл Бабаш, Асантемір Қаршығаұлы сынды қаламгерлер қатысты. Кеш барысында Табылды Досымовтың әндері ғана орындалған жоқ, ақындар жырдан шашу шашса, замандастары көңіл толқытар естеліктерімен бөлісті.

Атыраудан, Маңғыстаудан, Ақтөбеден, Алматыдан келген талантты әншілер ақын-сазгердің шығармаларын орындады.

Әдеби-сазды кешті ақынның ұлы Абыл Аяш «Биіктік» әнімен аяқтады.