28 қазанда ҚР Ұлттық академиялық кітапханасының Өнер залында Қазақ ұлттық хореография академиясында дайындалған үш тілдегі «Қазақстанның хореографиялық өнері» энциклопедиясының таныстырылымы өтті. Басылым ҚР Ғылым және жоғары білім министрлігінің гранттық жобасы аясында жарық көрді. Энциклопедияның қағаз және электрондық нұсқаларында отандық театрлар мен шығармашылық ұжымдардың сахнасында балет спектакльдерін жасауға қатысқан белгілі қазақстандық балет әртістері мен халық биін орындаушылардың, балетмейстерлердің, композиторлардың, либреттистердің, сценографтардың дербес деректері және ұлттық хореографияны зерттеуге үлес қосқан педагогтар мен зерттеушілер туралы мәліметтер ұсынылған. Сондай-ақ ұлттық және авторлық спектакльдердің құрылу тарихы жүйелі түрде жазылып, балет театрларының, танымал кәсіби би ұжымдарының, хореографтарды дайындайтын оқу орындарының құрылу тарихы мен шығармашылық қызметтері қарастырылған. Және үшінші бөлімде Қазақстандағы хореографиялық өнер саласындағы фестиваль және байқаулардың тарихы туралы толық ақпараттар берілген.

Таныстырылымға ресми қонақтар мен қатар энциклопедияның авторлары,  хореография тарихы мен педагогикасы саласындағы беделді мамандар қатысты.